लसीकरणावर तज्ज्ञांच्या समिती प्रमुखांचं मत
तिसर्‍या लाटेत लहान मुलांवर परिणामाची शक्यता
केंद्रकडून आरोग्य पायाभूत सुविधांच्या पॅकेजवर काम सुरू
नवी दिल्ली | वृत्तसंस्था |
भारतात 12 ते 18 वर्षांदरम्यानच्या मुलांना येत्या सप्टेंबर महिन्यापासून लस उपलब्ध होऊ शकते. ‘झायडस कॅडिला’ या कंपनीची कोरोना लस लहान मुलांसाठी लवकरच उपलब्ध होऊ शकते, असं मत लसीकरणावर गठीत करण्यात आलेल्या तज्ज्ञांच्या समितीचे प्रमुख डॉ. एन.के. अरोरा यांनी व्यक्त केले आहे.
देशात अद्यापही करोनाच्या तिसर्‍या लाटेची टांगती तलवार कायम आहे. या लाटेत लहान मुलांना करोना विषाणू संक्रमणाचा सामना करावा लागू शकतो, असं मत काही तज्ज्ञांकडून व्यक्त करण्यात आलं होतं. परंतु, ‘झायडस कॅडिला’च्या कोरोना लसीच्या चाचणीचा निकाल सप्टेंबरपूर्वीच हाती येण्याची शक्यता आहे. चाचणीत लस यशस्वी ठरली तर ती लहान मुलांसाठी वापरता येऊ शकते, असं डॉ. अरोरा यांनी एका न्यूज चॅनलशी बोलताना म्हटले आहे.
लहान मुलांसाठी ‘झायडस कॅडिला’सोबतच देशात ‘भारत बायोटेक’च्या ‘कोवॅक्सिन’ या लसीचीही तिसर्‍या टप्प्यातील चाचणी सुरू आहे. येत्या सप्टेंबर महिन्याच्या शेवटपर्यंत या चाचणीचे निकालही हाती येतील. त्यामुळे ऑक्टोबर ते फेब्रुवारी या काळात 2 ते 18 वर्षांच्या मुलांच्या लसीकरणाला देशात सुरुवात होण्याची शक्यता व्यक्त केली जातेय.अर्थात, करोनाच्या तिसर्‍या लाटेत मुलांवर परिणाम होण्याची शक्यता काही तज्ज्ञांनी फेटाळूनही लावली आहे. परंतु, याबाबतीत कोणतीही हलगर्जीपणा महागात पडू शकतो, याची जाणीव सरकारला आहे. त्यामुळेच देशात शाळा आणि कॉलेज सुरू करण्याच्या मुद्यावरही गंभीरतेनं निर्णय घेतला जातोय.
आरोग्य यंत्रणा सज्ज
केंद्र सरकार एका आरोग्य पायाभूत सुविधांच्या पॅकेजवर तयारी करत आहे. याद्वारे देशभरात 736 जिल्ह्यांत पेडियाट्रिक सेंटर उभारले जाणार आहेत, तसंच लहान मुलांसाठी 4000 आयसीयू बेडचीही व्यवस्था केली जाणार आहे. येत्या नऊ महिन्यांत हे पॅकेज लागू केलं जाईल. दिल्ली, महाराष्ट्रासहीत अनेक राज्य सरकारही करोनाच्या तिसर्‍या लाटेला तोंड देण्यासाठी आणि लहान मुलांना धोक्यापासून दूर ठेवण्यासाठी प्रयत्नशील आहेत, असे देशाचे नवे आरोग्यमंत्री मनसुख मंडाविया यांनी सांगितले.