। पेण । प्रतिनिधी ।
पेण तालुक्यातील आर्थिकदृष्टया संपन्न म्हणून ओळखली जाणारी ग्रामपंचायत म्हणजे वडखळ ग्रामपंचायत. परंतु, गेल्या दोन अडीच वर्षापासून या ग्रामपंचायतीमध्ये आर्थिक घोटाळा झाल्याची बाब समोर आली आणि सरपंच राजेश मोकल यांची धावपळ सुरु झाली. 23 डिसेंबर 2022 रोजी विभागीय कोकण आयुक्त महेंद्र कल्याणकर यांनी राजेश भिकाजी मोकल यांच्या विरुध्द महाराष्ट्र ग्रामपंचायत अधिनियम (1959 चा मुंबई अधिनियम क्र.3) कलम 39(1) अन्वये ग्रामपंचायत वडखळ सरपंच पदावरून काढून टाकण्याचे आदेश दिले. त्यानंतर राजेश मोकल यांनी या आदेशाविरुध्द उच्च स्तरावर दाद मागितली. त्याची सुनावणी 15 मार्च रोजी आहे. सद्यस्थितीत राजेश मोकल यांच्याविरुध्द आदेश जाण्याची भिती असल्याने त्यांनी घाईघाईने राष्ट्रवादीचे घडयाळ सोडून भाजपचे कमळ हातात घेतले असल्याच्या चर्चांना माजमाध्यमांवर व पेण शहराच्या नाक्यानाक्यावर उधाण आला आहे. पहिल्यांदा काँग्रेसमध्ये असणारे राजेश मोकल यांनी भाजपमध्ये प्रवेश केला. त्यानंतर, भाजपची सत्ता आली नाही म्हणून वडखळच्या नाक्यावर मोठा गाजावाजा करुन राष्ट्रवादी काँग्रेसमध्ये प्रवेश केला.
विनोदिनी जनार्दन कोळी यांनी जिल्हा परिषदेकडे महाराष्ट्र ग्रामपंचायत अधिनियम कलम 39(1) नुसार कारवाईची मागणी केली होती. मात्र, तोपर्यंत महाविकास आघाडीचे सरकार बदलले होते. त्यामुळे ज्या ईच्छेने राष्ट्रवादीमध्ये प्रवेश झाला होता ती बाब साध्य झाली नाही आणि 23 डिसेंबर 2022 रोजी विभागीय कोकण आयुक्त महेंद्र कल्याणकर यांनी राजेश भिकाजी मोकल यांच्या विरुध्द महाराष्ट्र ग्रामपंचायत अधिनियम (1959 चा मुंबई अधिनियम क्र.3) कलम 39(1) अन्वये ग्रामपंचायत वडखळ सरपंच पदावरून काढून टाकण्याचे आदेश दिले. त्यानंतर राजेश मोकल यांनी या आदेशाविरुध्द उच्च स्तरावर दाद मागितली.
महत्त्वाची बाब म्हणजे 23 डिसेंबर 2022 चा आदेश झाल्यानंतरही लाखो रुपयांची बिल काढल्याची तक्रार उपसरपंच योगीता रविंद्र मोकल यांनी मुख्याधिकारी रायगड जिल्हापरिषद यांच्याकडे 27 जानेवारी 2023 रोजी केली आहे. त्यामुळे एकंदरीत सर्व विचार करता 15 मार्च रोजी देखील राजेश मोकल यांच्याविरुध्द आदेश होण्याची शक्यता नाकारता येत नाही. मात्र भाजपजवळ अशी काही वॉशिंग मशिन आहे या वॉशिंग मशिनमध्ये कोणताही भ्रष्टाचार अथवा आदेश टाकल्यानंतर त्यांची धुलाई योग्यप्रकारे होते. त्यामुळे वडखळ सरपंचावर कारवाईची टांगती तलवार टळल्यास कुणाला आश्चर्य वाटू नये. मात्र एवढे नक्की ज्या तक्रारकर्र्त्या आहेत त्या म्हणजे विनोदिता कोळी या अगोदर पासून भाजपच्याच सदस्या असल्याने पक्षश्रेष्ठी नक्की न्याय कोणाला देणार, नव्यांना कि जुन्यांना याकडे सर्वांच्या नजरा लागल्या आहेत.