शेठ इलेव्हन नवगावचा उडविला धुव्वा
| अलिबाग | प्रतिनिधी |
तालुक्यातील आयकोनिक इलेव्हन भाल यांच्यातर्फे दि. 3 व 4 डिसेंबर रोजी ओव्हर आर्म क्रिकेट स्पर्धेचे वाघ्रण येथे आयोजन करण्यात आले होते. या स्पर्धेच्या अंतिम सामन्यात युवराज इलेव्हनने शेठ इलेव्हन नवगावचा धुव्वा उडवित चषक आपल्या नावे केला.
दरम्यान, या दोन दिवसीय स्पर्धेला तालुक्यातील 24 संघांनी सहभाग घेतला होता. स्पर्धेतील प्रत्येक सामना तीन षटकांचा खेळविण्यात आला. अंतिम सामन्यात युवराज इलेव्हनने शेठ नवगावचा पराभव करुन विजेतेपद पटकाविले. त्यामुळे शेठ नवगाव इलेव्हनला उपविजेतेपदावरच समाधान मानावे लागले. स्पर्धेतील विजेते व उपविजेत्यांना चषक देऊन गौरविण्यात आले. स्पर्धेत उत्कृष्ट गोलंदाज म्हणून युवराज इलेव्हनच्या आर्यन खारकर याला, तर उत्कृष्ट फलंदाज म्हणून नवगाव इलेव्हनच्या भाग्येश चौलकरला गौरविण्यात आले. मालिकावीराचा मान युवराज इलेव्हनच्या मंथन डाकी याला प्रदान करण्यात आला. यावेळी मोठ्या संख्येने क्रिकेटरसिक उपस्थित होते.