माघी उत्सवासाठी ग्रामस्थ सज्ज

। चिरनेर । प्रतिनिधी ।

उरण तालुक्यातील ऐतिहासिक चिरनेर गावातील अत्यंत प्राचीन अशा श्री महागणपती मंदिरात मंगळवारी (दि.13) माघी गणेशोत्सवाच्या निमित्ताने येणार्‍या लाखो भाविकांची गर्दी लक्षात घेऊन मंदिर प्रशासनासह चिरनेर ग्रामस्थांनी भक्तांच्या स्वागतासाठी जय्यत तयारी सुरू केली आहे.

चिरनेर येथील जागृत महागणपतीचे दर्शन घेण्यासाठी वर्षभर राज्याच्या विविध प्रांतांच्या कानाकोपर्‍यातून भाविक या धार्मिक स्थळी येत असतात. या उत्सवाला परिसरात यात्रेचे स्वरूप येते. वर्षातील माघी गणेशोत्सव हा प्रचंड मोठा उत्सव असून संपूर्ण चिरनेर गाव भाविक भक्तगणांनी फुलून निघतो. या सर्व भक्तगणांची गैरसोय होऊ नये, सर्वांना सुखकर सोयी सुविधा, रांगेत दर्शन घेता यावे, वाहतूक कोंडी होऊ नये, गणेश भक्तांना पिण्याच्या पाण्याची उत्तम सोय व महाप्रसादाची व्यवस्था व्हावी, त्याचबरोबर उत्सवाला गालबोट लागू नये यासाठी कडक बंदोबस्त, तसेच चिरनेर गणपती देवस्थान प्रशासनाकडून आवश्यक व सुसज्ज असे नियोजन करण्यात आले आहे.

दरम्यान माघी उत्सवातील विविध धार्मिक कार्यक्रम शनिवार दि.10 ते 14 फेब्रुवारीपर्यंत चालणार आहेत. यात श्रींचा महाअभिषेक, महापूजा, जन्मोत्सव सोहळा, महाआरती, महाप्रसाद, श्रींची पालखी मिरवणूक, भजन, कीर्तन, भावगीते व भक्तीगीतांचे कार्यक्रम होणार आहेत.