वर्ल्ड कप जिंकवून देणार्‍या खेळाडूवर रोजंदारीची पाळी

गुजरात सरकारकडे तीन वेळा मदत मागूनही निराशा
| नवी दिल्ली | वृत्तसंस्था |
2018 साली दुबई शारजाह येथे झालेल्या अंध खेळाडूंच्या क्रिकेट विश्‍वचषकात भारताला वर्ल्ड कप जिंकवून देण्यात महत्त्वाची भूमिका पार पाडणार्‍या नरेश तुमदाला आपल्या कुटुंबाच उदरनिर्वाहासाठी मोलमजुरी करावी लागत आहे. अनेकदा गुजरात सरकारकडे तीन-तीन वेळा मदतीची याचना केली; परंतु त्याकडे सरकारने कानाडोळा केला आहे.

नरेश तुमदा हा गुजरातच्या नवसारी येथील रहिवासी आहे. त्याला आज 250 रुपये रोजंदारीवर मजुरी करण्याची वेळ आली आहे. एकीकडे टोकियो ऑलिम्पिकमध्ये पदक विजेत्या भारतीय खेळाडूंवर सरकार, विविध संस्था अक्षरश: पैशाचा पाऊस पाडत आहेत. या सर्व खेळाडूंनी देशाचा सन्मान वाढवल्याने त्यांच्यावर अशाप्रकारे कौतुकाचा वर्षाव होत असताना, देशासाठी आपले आयुष्य पणाला लावणार्‍या नरेशसारख्या अनेक खेळाडूंना कष्टाचे जीवन पदरी पडत आहे. दुबईत शारजाह येथे खेळवण्यात आलेल्या अंतिम सामन्यात त्याने पाकिस्तानच्या 308 धावांच्या लक्ष्याचा पाठलाग करत भारताला विश्‍व चषक जिंकवून दिला होता.

• मी आतापर्यंत तीन वेळा गुजरातच्या मुख्यमंत्र्यांकडे मदतीसाठी गेलो आहे. मला एखादी सरकारी नोकरी मिळेल का? अशी विनंती केली. पण, अजूनपर्यंत कोणतेच सकारात्मक उत्तर आलेले नाही. – नरेश तुमदा .