सेक्टर 7 परिसरात तीव्र पाणीटंचाई
। पनवेल । वार्ताहर ।
सध्या पाऊस मोठ्या प्रमाणात सुरू आहे. ऐन पावसाळ्यामध्ये खांदा वसाहतीत तीव्र पाणीटंचाई निर्माण झाली आहे. विशेष करून सेक्टर 7 परिसरात सोसायट्यांच्या घशाला कोरड पडली आहे. त्यामुळे नागरिकांमध्ये तीव्र नाराजीचा सूर उमटला आहे. हा पाणीपुरवठा सुरळीत करण्याची मागणी रहिवाशांनी केली आहे. स्थानिक नगरसेविका सिताताई सदानंद पाटील यांचा सिडकोकडे अखंडित पाठपुरावा सुरू आहे.
नवीन पनवेलचा पश्चिम भाग असलेल्या खांदा वसाहतीची लोकवस्ती ही मोठ्या प्रमाणात वाढलेली आहे. इतर वसाहतींच्या तुलनेत या ठिकाणी पाणीपुरवठा अत्यंत कमी होत आहे. त्यातच सिडकोकडे साठवणूक क्षमता नसल्याने अनेक अडचणींना सामोरे जावे लागत आहे. खांदा वसाहतीच्या एका टोकाला असलेल्या सेक्टर 7 येथे बीयुडीपीची घरे आहेत. त्या सोसायट्यांमध्ये तीव्र पाणी टंचाई निर्माण होत आहे. दरम्यान पूर्वीच्या तुलनेत महाराष्ट्र जीवन प्राधिकरणाकडूनच पाणी कमी मिळत आहे. त्याच बरोबर कमी दाबाने पाणी येत आहे. त्यामुळे सेक्टर 7 मधील सोसायट्यांना आवश्यक पाणीसुद्धा प्राप्त होत नाही. वारंवार पाठपुरावा करूनही येथील वितरणामध्ये सुधारणा होताना दिसत नाही.
दरम्यान याबाबत नगरसेविका सिता सदानंद पाटील यांचा अखंडित पाठपुरावा सुरू आहे. नगरसेविका पाटील यांच्या मागणीनुसार पाणीपुरवठा विभागाचे सहाय्यक अभियंता जगदाळे यांनी नुकतीच त्या परिसरात पाहणी करून पाणीपुरवठा सुरळीत करण्याच्या अनुषंगाने सर्वेक्षण केले. सर्व तांत्रिक बाबींची पडताळणी करून सेक्टर 7 परिसरातील सोसायट्यांना पाणी पुरवठा करण्याच्या अनुषंगाने सिडको प्रयत्न करत असल्याचे जगदाळे यांनी सांगितले.
त्वरित उपाययोजना करण्यात आल्या नाहीत तर जलकुंभाला टाळे ठोकून नागरिकांच्या पाण्याच्या मागणीची पूर्तता करण्यासाठी आंदोलन छेडण्यात येईल.
सिता पाटील, नगरसेविका