| अलिबाग विशेष | प्रतिनिधी |
तख्त प्रॉडक्शन्स सातारा निर्मीत प्रेम म्हणजे काय असतं….? या मराठी चित्रपटाचा टिझर आज अलिबाग येथील जे.एस.एम.कॉलेजमध्ये प्रदर्शित करण्यात आला. चित्रपटाचा टिझर महाविद्यालयात प्रदर्शित करण्याची ही पहिलीच वेळ आहे. यावेळी जनता शिक्षण मंडळाचे अध्यक्ष अॅड. गौतम पाटील, प्राचार्य डॉ. अनिल पाटील व चित्रपटाचे दिग्दर्शक श्री.प्रसाद इंगोले हे जातीने उपस्थित होते.
कै. जयवंतराव केळूसकर सभागृह या वेळी तुडुंब भरले होते व विद्यार्थ्यांचा उत्साह ओसंडून वाहत होता. याला कारण होते या चित्रपटातील कलाकारांची उपस्थिती! अंकिता शिंदळे, पूर्वा साळुंखे, संतोष क्षीरसागर हे चित्रपटातील कलाकार या वेळी उपस्थित होते. चित्रपटाचा टायटल टिझर प्रदर्शित झाल्यानंतर चित्रपटातील दोन प्रमुख गाण्यांचे प्रदर्शन करण्यात आले. निर्मात्यांनी दिलेल्या माहितीनुसार ही एक वेगळी कॉलेज जीवनातील युवा – युवतींची सकारात्मक प्रेम कहाणी आहे. यामध्ये खलनायक नाही! चंद्रामधी चेहरा तुझा…. जीव तुझ्यासाठी खुळावला… ही समीर पठाण यांनी लिहिलेली, विनित देशपांडे यांनी संगीतबद्ध केलेली व सुप्रसिद्ध गायक आदर्श शिंदे यांनी गायलेली गाणी लोकप्रिय होत आहेत.
जे.एस.एम.कॉलेज नवीन उदयोन्मुख कलाकारांना नेहमीच प्रोत्साहन दिले जाते, म्हणूनच या चित्रपटाच्या संपूर्ण युवा टीमला महाविद्यालयात टिझर प्रदर्शित करण्यास संधी देण्यात आली अशी माहिती प्राचार्य डॉ.अनिल पाटील यांनी दिली. गौतम पाटील यांनी या चित्रपटाच्या संपूर्ण युवा टीमचे कौतुक करून सर्व विद्यार्थी, महाविद्यालयाच्या वतीने चित्रपटास शुभेच्छा दिल्या व हा चित्रपट नक्कीच यशस्वी होईल असे प्रतिपादन केले. जे.एस.एम.च्यावतीनेे चित्रपटाचा नायक श्री. प्रसाद इंगोले याचा स्मृतीचिन्ह देऊन सत्कार करण्यात आला. यावेळी प्रा.डॉ. मीनल पाटील, जनसंपर्क अधिकारी डॉ. सिमंतीनी ठाकूर, कनिष्ठ महाविद्यालयाचे पर्यवेक्षक, श्री.एस.एस. केदार, श्री. प्रविण पाटील व ईतर शिक्षक वर्ग उपस्थित होते. कार्यक्रमाचे सूत्रसंचालन अपर्णा देव यांनी केले.
4 नोव्हेंबर 2022 रोजी प्रदर्शित होणारा हा चित्रपट सर्वांनी चित्रपटगृहात जाऊन जरूर पाहावा असे आवाहन सर्व उपस्थित कलाकारांनी यावेळी केले. चित्रपटाचा टिझर प्रदर्शित करण्यास परवानगी दिल्याबद्दल निर्माते प्रसाद इंगोले यांनी आभार मानले.