मोबाईल हिसकावण्यासाठी महिलेला चावा

तीन आरोपींना नागरिकांनी पकडून दिले पोलिसांच्या ताब्यात

| महाड | प्रतिनिधी |

महाड शहरात दिवसाढवळ्या घडलेल्या धक्कादायक घटनेत चोरीच्या उद्देशाने एका महिलेला अडवून तिच्या हातातील मोबाईल हिसकावण्याचा प्रयत्न करण्यात आला. या दरम्यान आरोपींपैकी एका मुलाने महिलेच्या हातांवर चावा घेतल्याने ती गंभीर जखमी झाली आहे. या घटनेमुळे शहरात खळबळ उडाली आहे.

मिळालेल्या माहितीनुसार, महाड तालुक्यातील कुर्ला गावातील काही मुले महाड शहरात फिरत होती. यावेळी कामानिमित्त रस्त्याने जात असलेल्या एका महिलेला लक्ष्य करत तिघांपैकी एका मुलाने अचानक पाठीमागून येत तिला अडवले. त्यानंतर तिच्या हातातील मोबाईल हिसकावून घेतला. महिलेकडून प्रतिकार होताच आरोपीने तिच्या दोन्ही हातांना चावा घेतला, ज्यामुळे ती गंभीर जखमी झाली. घटनास्थळी उपस्थित असलेल्या नागरिकांनी तात्काळ धाव घेत आरोपींना पकडले. संतप्त नागरिकांनी त्यांना चोप देत पोलिसांच्या ताब्यात दिले. जखमी महिलेला तातडीने महाड ग्रामीण रुग्णालयात दाखल करण्यात आले असून तिच्यावर उपचार सुरू आहेत.

याप्रकरणी तिन्ही आरोपींना महाड शहर पोलीस ठाण्यात अटक करण्यात आली असून, पुढील तपास पोलीस करीत आहेत. जखमी महिला स्वाती चव्हाण यांनी सांगितले की, “मी माझ्या कामानिमित्त बाहेर जात असताना अचानक पाठीमागून येऊन एका मुलाने माझ्यावर हल्ला केला. माझ्या दोन्ही हातांना चावा घेतल्याने मला गंभीर जखमा झाल्या. हा हल्ला का करण्यात आला हे समजले नाही. याचा सखोल तपास पोलिसांनी करावा.” दरम्यान, आरोपींपैकी एकाने कबुली देताना सांगितले की, “आम्ही महाड शहरात फिरत असताना समोरून येणाऱ्या महिलेला अडवून मोबाईल हिसकावून घे असे माझ्या मित्रांनी सांगितले. त्यामुळे मी तिला अडवून मोबाईल हिसकावून घेतला.” या घटनेमुळे महाड शहरातील कायदा व सुव्यवस्थेचा प्रश्न पुन्हा ऐरणीवर आला असून, नागरिकांमध्ये भीतीचे वातावरण निर्माण झाले आहे.