महिलांची रस्त्यावर मच्छी विक्री

| तळा | प्रतिनिधी |

तळा शहरात मासळी बाजार नसल्याने महिलांवर रस्त्यावर मच्छी विक्री करण्याची वेळ आली आहे. अशावेळी अपघात घडल्यास जबाबदार कोण, असा प्रश्न आता उपस्थित केला जात आहे.

तळा शहरातील कुरुक्कर हॉस्पिटल समोर नवीन मासळी बाजाराची ईमारत उभी रहात आहे. सुरुवातीला या इमारतीचे काम युद्धपातळीवर सुरू होते. परंतु, निधी अभावी हळूहळू कामाची गती मंदावली. त्यामुळे गेल्या अडीच वर्षांपासून मासळी बाजार इमारतीचे काम अपूर्ण स्थितीत आहे. या इमारतीसाठी अंदाजित रक्कम 91 लाख 41 हजार 700 एवढी असून, नगरोथान योजनेच्या माध्यमातून 58 लाख रुपये मंजूर करण्यात आले आहेत. उर्वरित 33 लाख 41 हजार 700 रुपये ही रक्कम नगरपंचायतीला अद्याप प्राप्त झाली नसल्याने हे काम रखडले आहे. तळा बाजारपेठेत बसस्थानकाशेजारी असलेल्या जुन्या मासळी बाजारा योग्य सुविधा नसल्याने नाईलाजास्तव मच्छी विक्रेत्या महिलांना बाहेर रस्त्यावर बसावे लागत आहे. त्यामुळे एसटी लावण्यास अडचण निर्माण होत आहेत. याआधी एसटीच्या धडकेने येथील संरक्षक भिंत कोसळून मच्छीविक्रेत्या महिला गंभीर जखमी झाल्या होत्या. अशावेळी एखादा गंभीर अपघात घडला तर त्याची जबाबदारी नगरपंचायत प्रशासन घेणार का? असा प्रश्न उपस्थित केला जात आहे.