जमीन खरेदी-विक्रीची फसवणूक टाळण्यासाठी कार्यशाळा

| म्हसळा | वार्ताहर |

जमीन खरेदी देणार व खरेदी घेणार यांच्यामधील फसवणूक न होण्याच्या दृष्टीकोनातून, जमीन खरेदी देणार व खरेदी घेणार यांना एक व्यासपीठ उपलब्ध होण्याच्या दृष्टीने तहसिल कार्यालय म्हसळा यांच्या माध्यमातून सोमवार दि. 5 मे रोजी सकाळी दहाव्या कार्यशाळेचे आयोजन तहसीलदार सचिन खाडे यांनी केले आहे. यासाठी जमीन-खरेदी विक्रीसाठी इच्छुक नागरिकांनी उपस्थित राहण्याचे आवाहन तहसीलदार खाडे यांनी केले आहे.

या कार्यशाळेस म्हसळा तालुका दुय्यम निबंधक, उपअधीक्षक भूमी अभिलेख म्हसळा यांचे कार्यालयाकडील निमतानदार, सर्व मंडळ अधिकारी व ग्राम महसूल अधिकारी (तलाठी) हे उपस्थित राहणार आहेत. तालुक्यातील ग्राम महसूल अधिकारी यांच्यावर योग्य मार्गदर्शन करण्याची जबाबदारी सोपविण्यात आली असून, त्यामध्ये प्रामुख्याने खरेदी व विक्री जमिनीसंबंधी कागदपत्रांची सत्यता पडताळणे, जमीन विक्रेता यांची सत्यता पडताळणे, आवश्यक असणारे 7/12 व फेरफार जमीन-खरेदी विक्रीसाठी इच्छुक नागरिकांना देणे.

या कार्यशाळेत म्हसळा तालुक्यातील गावांच्या नावाचा पुकारा केला जाईल. त्याप्रसंगी त्या त्या गावातील जमीन-विक्री करणारे व इच्छुक खरेदीदारांना समोर बोलावून तद्नंतर संबंधित गावचे ग्राम महसूल अधिकारी (तलाठी) यांचे टेबलकडे पाठविले जाईल. या ग्राम महसूल अधिकारी (तलाठी) जमीन खरेदी देणार व जमीन विकत घेणार यांच्या शंकांचे सदर क्षेत्राबाबत समाधान करतील. दुय्यम निबंधक व उपअधीक्षक भूमी अभिलेख यांच्याशी संबंधित विषयास अनुसरून उपस्थित अधिकारी मार्गदर्शन करतील. तद्नंतर जमीन खरेदी देणार व जमीन खरेदी घेणार हे त्यांच्यातील आपसी समझोत्याद्वारे व त्यांना योग्य वाटेल अशा रकमेस सदर क्षेत्राचा व्यवहार करतील, असे म्हसळा तहसीलदार सचिन खाडे यांच्याकडून सांगण्यात आले.