विश्वविक्रमवीर दोन्ही हातांवर शंभर मीटर चालणार

‌राघवची ‘इंडिया बुक ऑफ रेकॉर्ड्स’साठी कसून तयारी

| नागपूर | वृत्तसंस्था |

अत्यंत कमी वयात आतापर्यंत तीन विश्वविक्रम करणारा नागपूरचा चिमुकला कराटेपटू राघव भांगडे हा आणखी एक विक्रम करणार आहे. यावेळी तो दोन्ही हातांवर शंभर मीटर चालून ‌‘इंडिया बुक ऑफ रेकॉर्ड्स’सह ‌‘गिनीस बुक’मध्येही नाव नोंदविण्याचा प्रयत्न करणार असल्याची माहिती विदर्भ कराटे असोसिएशनचे अध्यक्ष व राघवचे प्रशिक्षक विजय घिचारे यांनी दिली. हा अनोखा इव्हेंट येत्या रविवारी (दि.10) सकाळी सात वाजता राष्ट्रसंत तुकडोजी महाराज नागपूर विद्यापीठाच्या सिंथेटिक ट्रॅकवर होणार आहे. सिव्हिल लाइन्स येथील भवन्समध्ये चौथ्या वर्गात शिकणारा राघव कराटे या खेळात ब्लॅक बेल्ट आहे.

मी विक्रमासाठी सज्ज असून, कोणत्याही परिस्थितीत हा पराक्रम करणारच, असा विश्वास त्याने बोलून दाखविला. असा पराक्रम करणारा राघव त्याच्या वयोगटात पहिलाच मुलगा राहणार आहे. या इव्हेंटचे व्हिडिओ रेकॉर्डिंग होणार असून, इंडिया बुकची टीम लाइव्ह पाहणार आहे. याशिवाय डीसीपी अर्चित चांडक, विद्यापीठाचे क्रीडा विभागप्रमुख डॉ. शरद सूर्यवंशी, डॉ. धनंजय वेळूकर, डॉ. माधवी मार्डीकर, मनपाचे क्रीडा अधिकारी डॉ. पीयूष अंबुलकर व धनश्री लेकुरवाळे यांचा समावेश असलेली पंच कमिटीही (ज्युरी) राहणार आहे.

राघवचा पराक्रम पाहण्यासाठी उपमुख्यमंत्री देवेंद्र फडणवीस, भाजप प्रदेशाध्यक्ष चंद्रशेखर बावनकुळे, विद्यापीठाचे कुलगुरू डॉ. सुभाष चौधरी, आमदार परिणय फुके, वेद वासुदेव प्रतिष्ठानचे अध्यक्ष अजितदादा तुकदेव व बार कौन्सिल ऑफ महाराष्ट्रचे अध्यक्ष ॲड. परिजात पांडे उपस्थित राहणार आहेत.

वंडरबॉयची ‌‘वंडरफुल' कामगिरी
वंडरबॉय म्हणून ओळखल्या जाणाऱ्या नऊ वर्षीय राघवने डिसेंबर 2021 मध्ये अवघ्या 1 मिनिट 13 सेकंदात उलट्या हाताने पाच मजली इमारतीच्या तब्बल 120 पायऱ्या उतरून चक्रासनमध्ये नव्या विश्वविक्रमाची नोंद केली होती. शिवाय, 2019 मध्ये त्याने एका मिनिटात 125 टाईल्स फोडण्याचाही पराक्रम केलेला आहे. आंतरराष्ट्रीय कराटे स्पर्धेतही त्याने देशाला सुवर्णपदक मिळवून दिले आहे.