राज्यभरातील युवा प्रशिक्षणार्थी बेरोजगार

मुंबईतील आझाद मैदानावर सरकारविरोधात मोर्चा

| खारेपाट | प्रतिनिधी |

मुख्यमंत्री युवा कार्य प्रशिक्षण योजनेंतर्गत महाराष्ट्र शासनाच्या विविध शासकीय कार्यालयांमध्ये 11 महिन्यांचे प्रशिक्षण पूर्ण केलेल्या बेरोजगार प्रशिक्षणार्थींना रोजगार उपलब्ध करून द्यावा, अशी मागणी युवा प्रशिक्षणार्थी संघटना, महाराष्ट्र राज्य यांच्या वतीने करण्यात आली आहे. या मागणीसाठी 5 मार्च रोजी मुंबईतील आझाद मैदानावर भव्य महामोर्चाचे आयोजन करण्यात आले होते.

राज्यातील विविध जिल्ह्यांतील प्रशिक्षणार्थी मोठ्या संख्येने या मोर्चात सहभागी झाले होते. प्रशिक्षणार्थींनी ज्या शासकीय कार्यालयांमध्ये प्रशिक्षण पूर्ण केले आहे, त्याच ठिकाणी त्यांना प्राधान्याने कंत्राटी पद्धतीने रोजगार देण्यात यावा, अशी प्रमुख मागणी सरकारकडे करण्यात आली. यावेळी संघटनेचे प्रांताध्यक्ष निलेश वसावे, राज्य सचिव ऋषीकेश पवार, कार्याध्यक्ष पवन भड, अलिबाग तालुकाध्यक्ष प्रसन्न ठाकूर, रोहा तालुकाध्यक्ष ऐश्वर्य सायगावकर, खालापूर तालुकाध्यक्ष कुणाल तांडेल, सचिव समीर साळुंखे तसेच गणेश पवार, सार्थक सावंत, आर्यन मोकळ आदींसह राज्यभरातील प्रशिक्षणार्थी उपस्थित होते. सरकारने या मागणीवर तातडीने निर्णय घ्यावा, अन्यथा राज्यातील 36 जिल्ह्यांमध्ये धरणे आंदोलन करून आंदोलन अधिक तीव्र करण्यात येईल, असा इशारा युवा प्रशिक्षणार्थी संघटना, महाराष्ट्र राज्य यांच्या वतीने देण्यात आला आहे.