जिल्हा परिषद माजी आमदारांचे ‌‘लाड’ पुरवेना

शिक्षकांच्या बदल्यांसाठी सुरेश लाड यांचे आंदोलन

| रायगड | जिल्हा प्रतिनिधी |

कर्जतमधील जिल्हा परिषद शाळेतील शिक्षकांच्या बदल्यांचे लेखी आदेश काढून देखील त्याची कार्यवाही करण्यास मुख्य कार्यकारी अधिकारी यांनी टाळाटाळ केली. याप्रकरणी माजी आमदार सुरेश लाड यांनी मुख्य कार्यकारी अधिकारी यांना जाब विचारला. मात्र, त्यांच्या या प्रश्नांकडे दुर्लक्ष केले. अधिकाऱ्यांच्या मनमानी कारभाराबाबत नाराजी व्यक्त करीत लाड यांनी मुख्य कार्यकारी अधिकारी यांच्या दालनासमोर बैठक मांडून लढा पुकारला. माजी आमदारांचा अपमान केल्याची चर्चा जोरात सुरु आहे.

लाड यांच्या सांगण्यानुसार, कर्जतमधील जिल्हा परिषद शिक्षकांच्या बदल्यांच्या लेखी आदेशाची कार्यवाही करावी या मागणीसाठी शिक्षणाधिकाऱ्यांसह मुख्य कार्यकारी अधिकारी यांच्याशी माजी आ. लाड यांनी संपर्क साधला. त्यानंतर सोमवारी (दि.13) दुपारी मुख्य कार्यकारी अधिकारी यांची भेट घेण्यासाठी जिल्हा परिषदेमध्ये गेले होते. परंतु, त्या शिक्षक पुरस्कार सोहळ्याच्या कार्यक्रमाला गेल्या होत्या. त्याठिकाणीदेखील लाड गेले. कार्यक्रम प्रत्यक्षात सुरु होण्या अगोदर लाड यांनी मुख्य कार्यकारी अधिकारी नेहा भोसले यांची व्यासपिठावर भेट घेऊन बदल्यांच्या प्रश्नांबाबत विचारणा केली. दरम्यान महिला व बालविकास मंत्री आदिती तटकरे यांनी मध्येच हस्तक्षेप करीत बदल्यांसदर्भात आम्ही काय करणार, म्हसळ्या तालुक्यात 50 पदे रिक्त आहेत, असे म्हणल्या. त्यावेळी व्यासपिठावरच बदल्यांवरून शाब्दीक वाद सुरु झाला. यामुळे अपमानीत झालेल्या सुरेश लाडाने व्यासपिठावरून खाली उतरत मुख्य कार्यकारी अधिकारी नेहा भोसले यांचे कार्यालय गाठले.

हे सर्व नाट्य कार्यक्रमास उपस्थित शिक्षक, त्यांचे नातेवाईक आणि कार्यकर्ते पहात होते. कार्यक्रम सुरु होण्याापूर्वीच हा सर्व प्रकार सुरु असताना सभागृहात कमालीची शांतता पसरली होती. याबद्दल बोलताना माजी आमदार सुरेश लाड यांनी सांगितले की, कर्जत खालापूर तालुक्यातील शिक्षकांच्या रिक्त पदांबाबत विचारणा करीत होतो. 25 सप्टेंबर रोजी शिक्षकांच्या मुलाखतीनंतर बदल्या करण्यात आल्या. मात्र, अद्यापही या शिक्षकांना सबंधित तालुक्यातून सोडण्यात आले नाही. कर्जत तालुका आदिवासी बहुल असल्याने दुर्गम भागात शिक्षकांची गरज भासत आहे. त्यामुळे लवकरात लवकर शिक्षकांनी हजर होण्याची मागणी तेथील पालक करीत आहेत. मतदार संघातील नागरिकांच्या हिताचा हा प्रश्न होता. आदिती तटकरे यांनी असे उत्तर देणे अपेक्षीत नव्हते असे लाड म्हणाले. त्यानंतर लाड यांनी अलिबागमधील जिल्हा परिषदेच्या मुख्य कार्यकारी अधिकारी नेहा भोसले यांच्या दालनासमोरील प्रतिक्षा कक्षाच्या आवारात बैठक मांडली. त्याठिकाणी ते बसून राहिले. जिल्हा परिषदेमध्ये थांबून सीईओंकडून शिक्षकांना शाळांवर हजर होण्याचे आदेश घेऊनच जाणार आहे.असे लाड म्हणाले.

ऑनलाईन पोर्टलवर बदल्या होतात. सातवा ऑफ लाईन राऊंड झाल्यावर पुढील कार्यवाही केली जाईल. 15 पैकी 12 तालुक्यातील रिलीज झाले आहेत.
आता मात्र कार्यवाही करणे शक्य नाही.

नेहा भोसले
मुख्य कार्यकारी अधिकारी