नोकरीचे आमिष दाखवून 65 लाखांना गंडा

। रत्नागिरी । वृत्तसंस्था ।
इंडियन कोस्टगार्डमध्ये नोकरीला लावतो, असे सांगून तब्बल 126 जणांना 65 लाख रुपयांचा गंडा घातल्याचा प्रकार उघडकीला आला आहे. याप्रकरणी शहर पोलिसांनी मुनाफ अब्दुल रज्जाक भाटकर (रा. भाट्ये – काटली, रत्नागिरी) याच्याविरोधात गुन्हा दाखल केला आहे. हा प्रकार 17 सप्टेंबर 2017 ते 6 सप्टेंबर 2019 या कालावधीत घडला आहे.

या प्रकरणी विशाल सुभाष गुरव (29, रा. रामवाडी वाकेड, लांजा) याने शनिवारी सायंकाळी रत्नागिरी शहर पोलीस स्थानकात फिर्याद दिली आहे. त्यानुसार संशयित मुनाफ भाटकर याने सन 2017 ते 2019 या कालावधीत विशाल गुरव याला इंडियन कोस्टगार्ड, रत्नागिरी येथे नाविक जनरल ड्युटी, ड्रायव्हर ड्युटीकरिता नोकरीला लावतो, असे सांगून 50 हजार रुपये घेतले होते. या प्रकरणाचा तपास करत असताना मुनाफ भाटकर याने आणखी काही मुलांकडून पैसे घेतल्याचे उघड झाले. त्याने तब्बल 126 जणांकडून अशाप्रकारे पैसे घेतल्याचे उघड होताच पोलीसही अवाक् झाले. त्याने प्रत्येकाकडून 50 हजार रुपये घेतल्याचे उघड झाले आहे. मुनाफ भाटकर याने 65 लाखांची रक्कम हडप केल्याचे तपासात उघड झाले. पैसे देऊनही अजून नोकरी न लागल्याने आपली फसवणूक झाल्याचे समजतात विशालने शहर पोलिसांकडे तक्रार दिली आहे. या घटनेचा तपास आर्थिक गुन्हे शाखा करत आहे.