पनवेल | वार्ताहर |
लग्नाचा तगादा लावणार्‍या प्रेयसीला विषारी इंजेक्शन देऊन खून करणार्‍या प्रियकराला पनवेल शहर पोलिसांनी अटक केली आहे. शनिवारी (दि.29 मे) पनवेल शहर पोलीस ठाण्याच्या हद्दीतील नियोजीत विमानतळाच्या जागेत कोल्ही- कोपर गावातील दत्त मंदिराजवळील रस्त्याच्या कडेला 35 ते 40 वर्षे वयाचे अनोळखी प्रेत सापडल्याने अकस्मात मृत्यूची नोंद करण्यात आली होती. सदरचे प्रेत हे महिलेचे असल्याने परिमंडळ-2 चे पोलीस उपायुक्त शिवराज पाटील व सहाय्यक पोलीस आयुक्त नितीन भोसले-पाटील यांनी याबाबत तपास करण्याच्या सूचना दिल्या होत्या.
सदर अकस्मात मृत्यू प्रकरणाची चौकशी सुरू असताना पनवेल तालुक्यातील नानोशी येथील रमेश शिवराम ठोंबरे (वय 36) यांनी या महिलेचा मृतदेह ओळखून तो त्यांच्या बहिणीचा असल्याचे सांगितले आणि बहिणीच्या मृत्यूबाबत संशय व्यक्त केला.
यादरम्यान रविवारी (दि.30 मे) रिक्षाचालक लक्ष्मण नाना गुदरे यांना तुरमाळे गावाजवळील रस्त्याच्या बाजूला मयत महिलेचे आधारकार्ड, पॅनकार्ड, पर्स व कपडे इत्यादी साहित्य असलेली पिवळ्या रंगाची प्लास्टिक पिशवी सापडली होती. त्याअनुषंगाने मयत महिलेचा भाऊ रमेश ठोंबरे याला पोलीस ठाण्यात बोलावण्यात आले. त्याने सदर साहित्य त्याच्या बहिणीचेच असल्याचे सांगीतले. तसेच तुरमाळे गावात राहणारा व पनवेलमधील पटेल हॉस्पिटल येथे वॉर्ड बॉय म्हणून काम करणारा चंद्रकांत गायकर नावाच्या व्यक्तीसोबत संबंध असल्याचे व याबाबत काही दिवसांपूर्वी फोनवर बोलताना त्यांच्यात वाद झाल्याची माहिती दिली.
त्याअनुषंगाने चंद्रकांत गायकर याला पोलीस ठाण्यात चौकशीसाठी बोलावण्यात आले. त्याच्याकडे सखोल चौकशी केली असता त्याने गुन्हयाची कबुली दिली. सदर महिलेसोबत त्याचे मागील 6 महीन्यांपासून प्रेमसंबंध होते. तसेच तिला गंभीर आजार देखील होता. तरीदेखील ती लग्न करण्याचा आग्रह करून नेहमी वाद घालत होती व सतत धमकी देत होती. त्यामुळे तिच्या त्रासाला कंटाळूनन त्याने तिला जीवे ठार मारण्याचे ठरवले. त्याउद्देशाने पूर्वतयारी करून तिला आजारातूनन बरे होण्यासाठी इंजेक्शन देतो असे सांगून नियोजित विमानतळाच्या जागेत नेऊन चार वेगवेगळे इंजेक्शन्स् व केटामाईन हे विषारी इंजेक्शन आयव्ही इंट्राकॅथद्वारे देऊन जिवे ठार मारले. तसेच तिची ओळख पटू नये व गुन्हयामध्ये कोणताही पुरावा सापडू नये यासाठी तिच्याजवळील मोबाईल व पिशवी फेकून देऊन तिथून निघून गेला होता.
आरोपी चंद्रकांत विठ्ठल गायकर (वय 35) याला आज (दि.31 मे) पनवेल शहर पोलिसांनी अटक केली असून त्याला 05 जून 2021 पर्यंत पोलीस कोठडी रिमांड मिळाली आहे. सदरची कारवाई पनवेल शहर पोलीस ठाण्याचे वरिष्ठ पोलीस निरीक्षक अजयकुमार लांडगे व गुन्हे शाखेचे पोलीस निरीक्षक संजय जोशी यांच्या मार्गदर्शनाखाली सपोनि अनिल देवळे, सपोनि हुलगे, पोलीस उपनिरीक्षक सुनिल तारमळे, पोहवा रविंद्र राउत, पोहवा वाघमारे, पोशि विवेक पारासुर, पोशि युवराज राऊत, पोशि सुनिल गर्दनमारे, पोना परेश म्हात्रे, पोना विनोद पाटील, पोशि यादवराव घुले, पोना पंकज पवार, पोना गणेश चौधरी, पोशि खेडकर व पोशि भगवान साळुंखे यांनी केली आहे.