शिव आधार संस्थेचा वृक्षारोपण उपक्रम

| खारघर | प्रतिनिधी |

जागतिक पर्यावरण दिनाचे औचित्य साधून सेक्टर-11, खारघर येथील शिव आधार सामाजिक सेवा संस्थेच्या वतीने वृक्षारोपण कार्यक्रम उत्साहात पार पडला. पर्यावरण संवर्धनाचा संदेश देत संस्थेने विविध देशी वृक्षांची लागवड केली. विशेष म्हणजे, ही संस्था दरवर्षी केवळ एक झाड लावण्याचा संकल्प करत असली, तरी त्या झाडाचे संगोपन आणि संवर्धन अत्यंत काळजीपूर्वक करते. संस्थेने आतापर्यंत एकूण 12 झाडांची लागवड केली असून सर्व झाडे सुस्थितीत वाढत आहेत. या झाडांची नियमित देखभाल व संरक्षणाची जबाबदारीही संस्था स्वतः पार पाडत आहे. संस्थेने वड, पिंपळ, कारंजा, बदाम तसेच कॉनॉकोरपस यांसारख्या विविध वृक्षांची लागवड केली आहे. वाढत्या शहरीकरणामुळे निर्माण होत असलेल्या सिमेंटच्या जंगलात हरितपट्टा निर्माण करण्यासाठी आणि पर्यावरणाचा समतोल राखण्यासाठी हा उपक्रम राबविण्यात येत असल्याचे संस्थेच्या पदाधिकाऱ्यांनी सांगितले. ‘वृक्ष लावा आणि वृक्ष जगवा’ हा संदेश प्रत्यक्ष कृतीतून देत शिव आधार सामाजिक सेवा संस्था पर्यावरण संरक्षणासाठी मोलाचे योगदान देत असून, नागरिकांनीही अशा उपक्रमांमध्ये सहभागी व्हावे, असे आवाहन यावेळी करण्यात आले.