सेंट लुईस रॅपिडमध्ये प्रज्ञानानंदने उत्कृष्ट कामगिरी

। सेंट लुईस । वृत्तसंस्था ।

भारतीय ग्रँडमास्टर आर. प्रज्ञानानंदने उत्कृष्ट कामगिरी करत सेंट लुईस रॅपिड अँड ब्लिट्झ बुद्धिबळ स्पर्धेच्या रॅपिड टप्प्यात अव्वल स्थान पटकावले आहे. नऊ फेऱ्यांनंतर, त्याने शक्य असलेल्या 18 पैकी 12 गुण मिळवले आहेत. आणि त्यामुळेच या वर्षाच्या अखेरीस होणाऱ्या ग्रँड चेस टूर (जीसीटी) फायनल्समध्ये पोहोचण्याची अपेक्षा आहे. 2026 च्या विश्वविजेतेपदाच्या शर्यतीतून बाहेर पडलेल्या प्रज्ञानानंदने रॅपिड टप्प्यात अचूक रणनीती, उत्कृष्ट तंत्र आणि विजयी वृत्तीचे शानदार प्रदर्शन केले. अंतिम (नवव्या) फेरीत नेदरलँड्सच्या ग्रँडमास्टर जॉर्डन व्हॅन फोरिस्टकडून पराभव पत्करावा लागला असला तरी, तो अजूनही एका गुणाच्या आघाडीसह पुढे आहे. उझबेकिस्तानचा झवोखिर सिंदारोव्ह 11 गुणांसह दुसऱ्या स्थानावर आहे. या वर्षीच्या विश्व बुद्धिबळ अजिंक्यपद स्पर्धेच्या अंतिम सामन्यात सिंदारोव्ह भारताच्या डी. गुकेशला आव्हान देईल. अमेरिकेचा वेस्ली सो देखील 11 गुणांसह अव्वल स्थानाच्या शर्यतीत कायम आहे. मात्र, स्पर्धेचा निकाल केवळ रॅपिड टप्प्यावर अवलंबून राहणार नाही. खेळाडू आता 18 ब्लिट्झ सामने खेळतील. आणि प्रत्येक विजयासाठी एक गुण मिळेल. एकूण 2,00,000 अमेरिकन डॉलर्सच्या बक्षीस रकमेच्या या स्पर्धेच्या विजेत्याला 50,000 अमेरिकन डॉलर्स मिळतील. प्रज्ञानानंदने अंतिम फेरी जिंकली असती, तर ब्लिट्झ टप्प्यात त्याची आघाडी आणखी मजबूत झाली असती. रॅपिड टप्प्यात त्याने चार विजय, चार बरोबरी आणि एका पराभवासह 12 गुण मिळवले आहेत. रॅपिड टप्प्यानंतर, लेव्हॉन अरोनियन, लेनियर डोमिंग्वेझ पेरेझ, अनिश गिरी आणि व्हिन्सेंट केमर हे प्रत्येकी नऊ गुणांसह गुणतालिकेत चौथ्या स्थानावर बरोबरीत आहेत. विशेषतः केमरला ब्लिट्झ बुद्धिबळातील एक बलाढ्य खेळाडू मानले जाते आणि तो विजेतेपदाची शर्यत रोमांचक बनवू शकतो.