पनवेल येथील मोठ्या उद्योजकावर वाशी मंडळाची धडक कारवाई, कारवाईतून १ कोटी २९ लाख वसूल

| मुंबई | वृत्तसंस्था |
महावितरण पनवेल विभागात उच्चदाब ग्राहक मे. ऑस्कर इन्फ्रा या स्टोन क्रशरच्या मीटरचा एमआरआय अहवालची चाचणी केली असता चाचणीमध्ये अनियमितता आढळून आली व जून २०२१ पासून कमी नोंद होत असल्याचे दिसून आले. कंपनीचे मालक जियाउद्दीन इक्बाल पटेल यांची १ कोटी २९ लाख १६ हजार रुपयेची ७,२३,६९८ केव्हीएच युनिटची वीजचोरी वाशी मंडळाने उघडकीस आणली आहे व उद्योजकाविरुद्ध पनवेल शहर पोलीस ठाण्यात वीजचोरीचा गुन्हा दाखल करण्यात आला आहे.

उच्चदाब ग्राहकांचा मीटरचा एमआरआय अहवाल दर महिन्याला घेतला जातो.वाशी मंडळ कार्यालया अंतर्गत मे. ऑस्कर इन्फ्रा ग्राहक बंबावी गाव,ता .पनवेल जि.रायगड या उच्चदाब ग्राहकाच्या एमआरआय अहवालात माहे जून २०२१ पासून कमी नोंद होत असल्याचे वाशी मंडळ कार्यालयातील उच्चदाब बिलिंग विभागास दि .५ डिसेंबर २०२१ रोजी निदर्शनास आले.त्यामुळे अधीक्षक अभियंता वाशी मंडळ श्री. राजाराम माने यांनी मीटरच्या तांत्रिक तपासणी करिता चाचणी विभाग वाशी यांना सांगितले. त्याप्रमाणे दि.६ डिसेंबर २०२१ रोजी चाचणी विभाग व श्री. माने सदर मीटरच्या ठिकाणी गेले व त्या जागी तपासणी केली असता मे. जिनस कंपनी कढुन लावण्यात आलेल्या मीटरच्या सीलची एक तार तुटलेल्या अवस्थेत आढळून आली. सदर मिटरची लोड टेस्ट केली असता मीटर मध्ये कमी वीज वापराची नोंद होत असल्याचे तपासणीतून उघड झाले. दि.७ डिसेंबर २०२१ रोजी वाशी येथील चाचणी विभागाच्या प्रयोगशाळेत वीज ग्राहक जियाउद्दीन इकबाल पटेल, मे. जिनस या कंपनीचे प्रतिनिधी, अधीक्षक अभियंता वाशी मंडळ श्री. राजाराम माने, चाचणी विभागाचे कार्यकारी अभियंता श्री. बोडखे, अति. कार्यकारी अभियंता श्री. चोपडे व इतर अधिकारी व कर्मचाऱ्यांच्या उपस्थितीत वरील मीटरची तपासणी केली असता मीटरच्या सिटी सेकंडरी मध्ये बाह्य वस्तू बसवून तसेच वास्तविक वीज वापरापेक्षा कमी वीज वापराची नोंद होण्याची सहहेतुक व्यवस्था केली असल्याचे उघड झाले. सदर मीटर जप्त करण्यात आले असून सदर ग्राहकाने दि.१ जून २०२१ ते १ डिसेंबर २०२१ या कालावधीत मीटर मध्ये फेरफार करुन स्टोन क्रशर कंपणीसाठी ७,२३,६९८ केव्हीएच युनिटची रु.१ कोटी २९ लाख १६ हजार ३०३ ची वीजचोरी केल्याचे उघड झाले. त्यामुळे जियाउद्दीन इकबाल पटेल यांच्या विरुद्ध भारतीय विद्युत कायदा २००३ चे कलम १३५ (१)(ब) व कलम १३८ (ड) अन्वये पनवेल शहर पोलीस ठाण्यात वाशी मंडळचे अधीक्षक अभियंता, श्री. राजाराम माने यांनी गुन्हा दाखल केला असून सदर ग्राहकाने कारवाईच्या भीतीने त्वरित रु.१ कोटी २९ लाख १६ हजार ३०३ महावितरणकडे भरले.

या कारवाई दरम्यान असे समजले की सदर ग्राहकाचे कुंडेवहाळ गाव, पनवेल येथे याच नावाने स्टोन क्रशर कंपनी आहे. त्या जागेची तपासणी केली असता तेथे ही वीजचोरी करीत असल्याचे समोर आले. या प्रकरणात सुद्धा मालक जियाउद्दीन इक्बाल पटेल व त्यांचे दोन भागीदार रफिउद्दिन इकबाल पटेल व खालिद इकबाल पटेल या तिघांवर मे २०२१ ते ९ डिसेंबर २०२१ या कालावधीत ५,९४,७११ केव्हीएच युनिटची रु. १ कोटी १५ लाख, ८७ हजार ९९९ ची वीजचोरी केल्याचा गुन्हा नोंदवला आहे. ही वीजचोरी उघड करण्यात वाशी मंडळाच्या चाचणी विभागाने विशेष मेहनत घेतली असून मुख्य अभियंता भांडूप परिमंडल श्री. सुरेश गणेशकर यांनी संबंधित सर्व अधिकारी व कर्मचाऱ्यांचे कौतुक केले. “वीजचोरी करणे एक असामाजिक कृत्य आहेच शिवाय एक गुन्हा देखील आहे. ग्राहकांनी असा कृत्यापासून दूर राहावे. ग्राहक वीजचोरी करित असल्याचे आढल्यास सदर ग्राहकावर असाच गुन्हा दाखल करण्यात येईल. यामध्ये ग्राहकास रोख दंडाशिवाय अटक सुद्धा होऊ शकते. म्हणून प्रामाणिकपणे विजेचा वापर करुन वापरलेल्या विजेचे पैसे भरावे असे आवाहन भांडूप परिमंडलचे मुख्य अभियंता श्री. सुरेश गणेशकर यांनी केले आहे.