महाड पोलादपूर तालुक्यातील 30 गावांना अतिवृष्टीचा फटका
10 हजार 742 कुटूंबातील 54 हजार 599 सदस्य बाधीत
। अलिबाग । विशेष प्रतिनिधी ।
गेल्या आठवडयात रायगड जिल्ह्यात झालेल्या अतिवृष्टीत महाड पोलादपूर तालुक्यातील 30 गावांना अतिवृष्टीचा मोठा फटका बसला असून दोन्ही तालुक्यातील 10 हजार 742 कुटूंबातील 54 हजार 599 सदस्य बाधीत झाले आहेेत. सध्या पुरपरिस्थिती नियंत्रणात असून रायगड जिल्ह्यात 1 एनडीआरएफ तर 2 एसडीआरएफच्या तुकडया तळ ठोकून आहेत. सुरक्षेसाठी जिल्ह्यातील 1 हजार ग्रामस्थांचे स्थलांतर करण्यात आले आहे. संपूर्ण जिल्ह्यात अतिवृष्टीमुळे 71 जणांना आपला जिव गमवावा लागला आहे. तर 33 जनावरे मृत्यूमूखी पडले आहेत. तसेच 53 जण बेपत्ता तर 34 जण जखमी झाले आहेत.
रायगड जिल्ह्याला गंभीर पूरपरिस्थितीचा सामना करण्यासाठी राज्य शासनाने 2 कोटी रुपयांची आर्थिक मदत केली आहे. तसेच उद्भवलेल्या गंभीर पूरपरिस्थितीमुळे बाधित झालेल्या नागरिकांना, मृत व्यक्तींच्या कुटूंबियांना व जखमी झालेल्या नागरिकांना तातडीने मदत देणे आवश्यक असल्याने जिल्ह्याधिकार्यांना निधी उपलब्ध करण्यासाठी उणे प्राधिकार पत्रावर कोषागारातून रक्कम काढण्यासाठी मान्यता देण्यात आली आहे.
रायगड जिल्ह्यात मागील आठवड्यात जोरदार अतिवृष्टी झाली. 20 जुलैपासून 22 तारखेपर्यंत सातत्याने कोसळत असलेल्या मुसळधार पावसाने रौद्र रुप धरीत संपूर्ण जिल्ह्याला झोडपून काढले. त्यामुळे जिल्ह्यातील नद्यांची पातळी वाढून महाड तसेच पोलादपूर तालुक्यातील अनेक गावे पाण्याखाली गेली. 12 ते 15 फुट पाणी घरांमध्ये घुसल्याने अतोनात नुकसान झाले. तर 22 जुलै रोजी महाड तालुक्यातील तळीये मधील आळी येथे दरड कोसळल्याने 53 जणांना आपला जिव गमवावा लागला. तर 31 जण बेपत्ता झाले. त्याचप्रमाणे पोलादपूर तालुक्यातील केळवणे, सुतारवाडी येथे देखील दुर्घटनेत 11 जणांना आपले प्राण गमवावे लागले. तसेच तळीये येथे 6, केळवणे 6, व सुतारवाडी येथे 16 असे एकुण 28 जण जखमी झाले असून त्यांच्यावर उपचार सुरु आहेत.
वैशिष्टयपूर्ण योजनेंतर्गत महाड नगरपरिषदेला रु.50 लक्ष तर
पोलादपूर नगरपरिषदेला रु.1 कोटी निधी मंजूर
महाड व पोलादपूर तालुक्यात दि.22 जुलै 2021 रोजी झालेल्या अतिवृष्टीमुळे पूरपरिस्थिती निर्माण झाल्याने आरोग्य, साफसफाई, पाणीपुरवठा इत्यादी अत्यावश्यक बाबींबर तात्काळ उपाययोजना करण्यासाठी महाड व पोलादपूर नगरपरिषदेस वैशिष्ट्यपूर्ण योजनेंतर्गत शासनाच्या नगर विकास विभागाच्या दि.26 जुलै च्या शासन निर्णयान्वये महाड नगरपरिषदेसाठी रक्कम रु.50 लक्ष तर पोलादपूर नगरपरिषदेसाठी रु.1 कोटी इतका निधी मंजूर करण्यात आला आहे.