ऑस्ट्रेलियाने श्रीलंकेला पाच विकेट्सने हरवले
। नवी दिल्ली । वृत्तसंस्था ।
श्रीलंकेचा पाच विकेट्सने पराभव करत ऑस्ट्रेलियाने यंदाच्या विश्वचषकातील विजयाचे खाते उघडले आहे. श्रीलंकेने दिलेले 210 धावांचे आव्हान ऑस्ट्रेलियाने पाच विकेट 35.2 षटकात पार केले.
श्रीलंकेने दिलेल्या 210 धावांच्या माफक आव्हानाचा पाठलाग करताना ऑस्ट्रेलियाची सुरुवात अतिशय खराब झाली. सलामी फलंदाज डेविड वॉर्नर आणि अनुभवी स्टिव्ह स्मिथ स्वस्तात माघारी परतले. मधुशंकाच्या एकाच षटकात दोन्ही फलंदाज तंबूत परतले. डेविड वॉर्नर बाद झाल्यानंतर पंचांच्या निर्णायावर नारज दिसला. अनुभवी सलामी फलंदाज डेविड वॉर्नर फक्त 11 धावांवर तंबूत परतला. मधुशंकाच्या चेंडूवर डेविड वॉर्नरला एलबीडब्ल्यू देण्यात आले. स्मिथलाही खाते उघडता आले नाही. मधुशंका यानेच त्याला तंबूत पाठवले.
पुन्हा त्यांना पराभवाचा धक्का बसणार की काय? अशी चर्चा सुरु झाली असतानाच मिचेल मार्श आणि इंग्लिंश यांनी अर्धशतकी खेळी करत ऑस्ट्रेलियाला गेममध्ये परत आणले. मिचेल मार्श याने 51 चेंडूत 9 चौकारांच्या मदतीने 52 धावांची खेळी केली. मार्श बाद झाल्यानंतर जोश इंग्लिंश आणि मार्नस लाबुशेन यांनी डाव सावरला. दोघांनी धावसंख्या वाढवली. लाबुशेन याने 60 चेंडूत 2 चौकारांच्या मदतीने 40 धावा केल्या. जोश इंग्लिंश याने झंझावती अर्धशतक ठोकले. त्याने एक षटकार आणि पाच चौकारांच्या मदतीने 59 चेंडूत 58 धावांची खेळी केली. लाबुशेनला मधुशंका यानेच माघारी धाडले तर, वेल्लालागे याने इंग्लिंश याला तंबूत पाठवले.
पाच विकेट पडल्यानंतर ऑस्ट्रेलियाची फलंदाजी कोसळणार की काय? असे वाटत असताना ग्लेन मॅक्सवेल आणि मार्कस स्टॉयनिस यांनी झंझावती फलंदाजी करत ऑस्ट्रेलियाला विजय मिळवून दिला. मॅक्सवेल याने 21 चेंडूमध्ये दोन षटकार आणि चार चौकारांच्या मदतीने 31 धावांची खेळी केली. तर, मार्कस स्टॉयनिस याने एक षटकार आणि दोन चौकारांच्या मदतीने 20 धावांचे योगदान दिले.