बळीराजा हटेना, तोडगा निघेना!

6 मार्चला दिल्लीकडे कूच, तर 10 मार्चला देशभरात रेल्वे रोकोचा इशारा

| नवी दिल्ली | वृत्तसंस्था |

पंजाबमधील शेतकरी हमीभाव कायद्याच्या मागणीसह विविध मागण्यांसाठी दिल्ली चलो आंदोलन 13 फेब्रुवारीपासून पुकारले आहे. शेतकरी आंदोलनाचा सोमवारी (दि. 4) 21 वा दिवस आहे. पंजाब व हरियाणाच्या सीमेवरील शंभू आणि खनौरीमध्ये 200 हून अधिक शेतकरी संघटना एकवटल्या असून, शेतकरी आपल्या मागण्यांवर ठाम आहेत. शेतकरी आणि सरकारमध्ये बैठका झाल्या, मात्र यातून अद्याप तोडगा निघालेला नाही. मध्यंतरी शेतकरी आंदोलन स्थगित करण्यात आले होते. मात्र, आंदोलक शेतकर्‍यांनी 6 मार्चला दिल्लीकडे कूच करण्याचा निर्णय घेतला असून, 10 मार्चला दुपारी 12 ते 4 या वेळेत रेल्वे रोको आंदोलन करण्याचा इशारा दिला आहे. या आंदोलनात देशभरात शेतकर्‍यांनी सहभागी व्हावे, असे आवाहन करण्यात आले आहे.

पंजाब आणि हरियाणाच्या सीमेवर आंदोलक शेतकरी आजही ठाण मांडून कायम आहेत, असे शेतकरी नेते जगजित सिंग डल्लेवाल यांनी सांगितलं आहे. आम्ही शेतकरी आहोत. आम्ही काही दहशतवादी नाहीत. मात्र, पोलीस आमच्यावर गोळीबार करत आहेत. आम्हाला मध्येच अडवले जात आहे. अनेक सीमा सील केल्या आहेत. परंतु, हे सगळं झाले असले तरी आम्ही आमचा दिल्लीला जाण्याचा कार्यक्रम रद्द केलेला नाही. कोणतीही स्थिती आली तरी आम्ही दिल्लीला जाणार आहोत, असेही शेतकरी नेते जगजित सिंग डल्लेवाल म्हणाले आहेत. तसेच, आमच्या मागण्या मान्य न झाल्यास संपूर्ण देशातील शेतकरी या आंदोलनात सहभागी होतील, असा विश्‍वासही त्यांनी यावेळी व्यक्त केला.

येत्या 10 मार्चला आमचे देशभरात सकाळी 12 ते दुपारी 4 या वेळेत रेल्वे रोको आंदोलन होणार आहे. 13 फेब्रुवारीला शेतकर्‍यांना दिल्ली चलो मोर्चा काढण्यापासून रोखण्यात आले होते. तेव्हापासून हरियाणाच्या सीमेला लागून असलेल्या पंजाबच्या खनौरी आणि शंभू सीमेवर शेतकरी ठाण मांडून आहेत, अशी माहितीही जगजित सिंग डल्लेवाल यांनी दिली.

केंद्र सरकारवर दबाव आणण्यासाठी 14 मार्च रोजी दिल्लीत किसान महापंचायत होणार आहे. संयुक्त किसान मोर्चाने शनिवारी (2 मार्च) सांगितलं की, 400 पेक्षा अधिक शेतकरी संघटना ‘महापंचायत’मध्ये सहभागी होतील. तसेच, संयुक्त किसान मोर्चा आणि किसान मजदूर मोर्चा यांना सर्व शेतकरी संघटना आणि संघटनांमध्ये समस्या-आधारित ऐक्याचे आवाहन करणारा ठराव पाठवला आहे, असेही संयुक्त किसान मोर्चाने सांगितले आहे.