पाली- खोपोली महामार्गावर वाढते अपघात

वृद्धाच्या मृत्यूनंतर शिवसेनेचा रास्ता रोको
पाली/बेणसे | प्रतिनिधी |
पाली खोपोली राज्य महामार्ग मृत्यूचा सापळा बनला आहे.या वाढत्या वाहन अपघातात आतापर्यंत अनेकांचे हकनाक बळी गेले आहेत.गुरुवारीही झालेल्या अपघाताची गंभीर दखल घेत शिवसेनेतर्फे या मार्गावर रास्ता रोको करण्यात आले.तसेच या अपघात प्रकरणी ठेकेदारावर सदोष मनुष्यवधाचा गुन्हा दाखल करण्याची मागणी करण्यात आली.
गुरुवारी (दि.16) सकाळी आंबोले गावाजवळ मोटारीच्या धडकेत वृद्धाचा हकनाक मृत्यू झाला आहे.अनिल दळवी असे मयत वृद्धाचे नाव आहे. हे रस्त्याच्या बाजूने जात असतांना पाठून येणार्‍या मोटरची त्यांना जोरात धडक बसली आणि त्यांचा मृत्यू झाला. रस्ता अरुंद असल्याने तसेच समोरून वाहन येत असल्याने मोटर चालकास गाडी नेण्यास जागा नसल्याने मोटारीची दळवी यांना धडक बसली. या अपघातात त्यांचा मृत्यू झाला, या मार्गावर वारंवार अपघाती घटना घडत असल्याने जनतेत प्रचंड रोष आहे. या अपघातानंतर महामार्गावर तणावपूर्ण वातावरण निर्माण झाले.
एमएसआरडीसी अधिकारी व संबंधित ठेकेदार यांच्या विरोधात सदोष मनुष्यवधाचा गुन्हा दाखल करावा व मृताच्या कुटुंबांला 20 लाखाची भरपाई द्यावी या मागणीसाठी सुधागड शिवसेनेतर्फे राजेंद्र राऊत यांच्या नेतृत्वाखाली दुपारी काहीवेळ रस्ता रोको आंदोलन करण्यात आले होते.
मोटारचालकाविरोधात पाली पोलीस स्थानकात गुन्हा दाखल करण्यात आला आहे. अशी माहिती पोलीस निरीक्षक विजय तायडे यांनी दिली. तसेच एमएसआरडीसी अधिकारी व संबंधित ठेकेदार यांच्या विरोधात सदोष मनुष्यवधाचा गुन्हा दाखल करावा व मृताच्या कुटुंबांला 20 लाखाची भरपाई द्यावी या मागणीचे निवेदन तालुका शिवसेना आणि युवासेने तर्फे तहसीलदार दिलीप रायण्णावार यांना देण्यात आले आहे. तसेच संबधीत अधिकारी व ठेकेदार यांच्या सोबत बैठक घेतली जाईल असे पोलीस निरीक्षक विजय तायडे यांनी आश्‍वासन दिल्यानंतर रास्ता रोको आंदोलन स्थगित करण्यात आले आहे.
ठिकठिकाणी रस्त्याचे अर्धवट काम राहिले असून चिखलात मोठी वाहने फसून अपघात होत आहेत. या मार्गावर मोटारसायकल स्वार घसरून जखमी होण्याच्या घटना वाढल्या आहेत. तर अपघात होऊन निष्पाप जीवांचे बळी जातायेत. रास्तारोको आंदोलन करतेवेळी व निवेदन देतांना शिवसेना माजी उपजिल्हा प्रमुख राजेंद्र राऊत, तालुका युवासेना अधिकारी सचिन डोबळे, शिवसेना पाली शहर प्रमुख प्रदीप (दादू) गोळे, किशोर खरीवले, किरण पिंपळे, अजय मूळे, भास्कर दुर्गे, विजय भउड, निखिल शहा, प्रमोद खोडागळे, प्रवीण खाडे, निखिल खामकर व दीपेश लहाने आदी पदाधिकारी व कार्यकर्ते तसेच उपसरपंच शिरीष मांढरे, ग्रामस्थ मनोज मोरे, योगेश दळवी, सुरेश सावंत आदी ग्रामस्थ मोठ्या संख्येने उपस्थित होते.