मोहितेंचा शिंदेसेनेला सज्जड इशारा
| अलिबाग | प्रतिनिधी |
रायगडच्या राजकारणात भाजप आणि शिंदेसेनेतील अंतर्गत संघर्षाला आता नवे वळण मिळाले आहे. पेणमधील भाजप कार्यकर्त्यांनी शिंदेसेनेत प्रवेश केल्याच्या पार्श्वभूमीवर भाजपचे ॲड. महेश मोहिते आक्रमक झाले आहेत. पेणच्या राजकारणात हस्तक्षेप करू नका, असा थेट इशारा त्यांनी शिंदेसेनेला दिल्याने महायुतीतील मतभेद पुन्हा एकदा चर्चेत आले आहेत. राष्ट्रवादी आणि शिंदेसेनेतील वाद विकोपाला गेलेला असतानाच आता शिंदेसेनेविरोधात भाजपनेही रणशिंग फुंकले आहे. यामुळे आगामी काळात महायुतीतील शिंदेसेनेच्या राजकीय अस्तित्वावर प्रश्नचिन्ह निर्माण झाले आहे.
पेणमधील भाजप कार्यकर्त्यांच्या पक्षांतरामुळे स्थानिक राजकीय समीकरणांवर परिणाम होत असल्याची पार्श्वभूमी या वादाला आहे. कार्यकर्त्यांच्या पक्षांतरानंतर मोहिते यांनी आपली भूमिका स्पष्ट करत शिंदेसेनेने पेणमध्ये हस्तक्षेप करू नये, असा इशारा दिला. त्यामुळे पेणमध्ये भाजप आणि शिंदेसेनेतील राजकीय संघर्ष अधिक तीव्र होण्याची चिन्हे आहेत.
मोहिते यांनी केवळ पेणपुरतीच भूमिका मर्यादित न ठेवता शिंदेसेनेला अलिबाग तालुक्याबाबतही सल्ला दिला. ‘अलिबाग तालुक्यात भविष्यात आपला मतदारसंघ शिल्लक राहील का, याची आधी काळजी घ्या,’ अशा आशयाची टिप्पणी करत त्यांनी शिंदेसेनेच्या स्थानिक राजकीय अस्तित्वावरच प्रश्न उपस्थित केला.
आधी आमदार महेंद्र दळवी आणि महेश मोहिते यांच्यातील शाब्दिक चकमक, त्यानंतर शिवसेनेचे जिल्हाप्रमुख राजा केणी यांनी मोहिते यांच्यावर परप्रांतीय असल्याची केलेली टिप्पणी आणि आता पेणमधील कार्यकर्त्यांच्या पक्षांतरावरून मोहिते यांनी दिलेला इशारा, अशा घटनांमुळे रायगडमध्ये भाजप-शिंदेसेना संघर्षाची चर्चा रंगली आहे.
राज्यात सत्तेत एकत्र असलेल्या महायुतीतील दोन घटक पक्षांमध्ये रायगडमध्ये मात्र स्थानिक वर्चस्व, कार्यकर्त्यांचे पक्षांतर आणि मतदारसंघातील राजकीय प्रभाव यावरून मतभेद समोर येत आहेत. पेणमधील या इशाऱ्यानंतर शिंदेसेना काय भूमिका घेणार आणि भाजपचे स्थानिक नेतृत्व आपली भूमिका अधिक आक्रमक करणार का, याकडे राजकीय वर्तुळाचे लक्ष लागले आहे.






