रायगड प्रीमिअर लिगसाठी खेळाडूंची लिलाव प्रक्रिया पूर्ण

। पनवेल । वार्ताहर ।
रायगड जिल्ह्यात नोव्हेंबर महिन्यात होणार्‍या 25 वर्षा खालील खेळांडूसाठी 20-20 क्रिकेट स्पर्धेचे आयोजन रायगड प्रीमिअर लिग कमिटी मार्फत करण्यात येणार आहे. रायगड प्रीमिअर लिग हि नोंदणीकृत संस्था असून, स्पर्धेत खेळणार्‍या खेळाडूंचे लिलाव पनवेल तालुक्यातील मानघर येथील छाया रिसॉर्टमध्ये उत्साहाच्या वातावरणात करण्यात आली.

एकूण आठ संघांमध्ये ही स्पर्धा होणार असून रायगड जिल्ह्यातील सुमारे चारशे खेळाडूंनी या स्पर्धेत ऑनलाईन पद्धतीने फॉर्म भरून आपापला सहभाग नोंदवला होता. सदरच्या खेळाडूंना लिलाव पद्धतीने आठ संघांचे संघ मालक आभासी पॉईंट्स प्रकाराने आपापल्या संघात दाखल करून घेतले आहेत. प्रत्येक संघात 15 खेळाडूंचे लिलावाद्वारे पथक तयार करण्यात आले.

स्पर्धेत सहभागी होणार्‍या सर्व संघांना रायगड जिल्ह्यातील गडकिल्ल्यांची नावे देण्यात आली आहेत. यामध्ये रायगड वॉरियर्स संघमालक आदित्य दर्गे, देवेंद्र चवरे, द्रोणागिरी मास्टर्स संघमालक फ्रेंड्स क्लब, सुधागड रायगड संघमालक आवेश चीचकर, सह्याद्री चॅम्पियन्स संघमालक रतन खारोल आणि दिपक ठक्कर, जंजिरा चॅलेंजर्स संघमालक सचिन राऊळ, कुलाबा स्ट्राईकर्स संघमालक संदेश गुंजाळ आणि अभिजित तुळपुळे, खांदेरी-उंदेरी किंग्स संघमालक कुमार बासरे, उमरखिंड फायटर्स संघमालक अ‍ॅड.आलिंम शेख, विजय खानावकर आणि प्रदिप स्पोर्ट्स. या आठ संघांचा समावेश स्पर्धेत असणार आहे.

या कार्यक्रमासाठी सिडकोच्या एम्प्लॉइज युनियनचे अध्यक्ष निलेश तांडेल, प्रभाकर घरत उपमहाव्यवस्थापक ओनजीसी, सिडको युनियनचे उपाध्यक्ष विनोद पाटील, सचिव जे.टी पाटील, जिल्हा परिषद सदस्य रवी पाटील, सुप्रसिद्ध उद्योजक मार्फी क्रीयाडो, लायन्स क्लब खोपोलीचे अध्यक्ष महेश राठी, रायगड जिल्हा क्रिकेट असोसिएशनचे कार्याध्यक्ष प्रदीप नाईक, विजय खानावकर नगरसेवक पनवेल, युवा नेते अ‍ॅड.विक्रांत घरत, रायगड प्रीमिअर लिगचें अध्यक्ष राजेश पाटील, सचिव जयंत नाईक, उपाध्यक्ष आनंद घरत, आदी मान्यवर उपस्थित होते.