रायगडात 19 लाख 49 हजार 341 मतदारांचे डिजिटायझेशन बाकी!

5 लाख 84 हजार 118 मतदारांचे गणना प्रपत्र संकलित नाही; 30 सप्टेंबरपर्यंत दावे-हरकतीची संधी

| रायगड | प्रतिनिधी |

रायगडच्या मतदार यादीच्या विशेष सखोल पुनरीक्षणातून मोठी आकडेवारी समोर आली आहे. जिल्ह्यातील तब्बल 19 लाख 49 हजार 341 मतदारांच्या गणना प्रपत्राचे डिजिटायझेशन अद्याप झालेले नाही, तर 5 लाख 84 हजार 118 मतदारांचे गणना प्रपत्र संकलित करता आलेले नाही. त्यामुळे प्रारूप मतदार यादीत आपले नाव आहे की नाही, याची तपासणी करण्याचे आवाहन जिल्हाधिकारी तथा जिल्हा निवडणूक अधिकारी किशन जावळे यांनी केले आहे.

विशेष सखोल पुनरीक्षण कार्यक्रमांतर्गत (एसआयआर-2026) जिल्ह्यातील सात विधानसभा मतदारसंघांची प्रारूप मतदार यादी सोमवारी (दि.31 ऑगस्ट) प्रसिद्ध करण्यात आली. जिल्ह्यात एकूण 25 लाख 33 हजार 739 मतदार असून, 2 हजार 747 मतदान केंद्रे आहेत.

पनवेल मतदारसंघात 6 लाख 84 हजार 95, कर्जतमध्ये 3 लाख 19 हजार 337, उरणमध्ये 3 लाख 57 हजार 255, पेणमध्ये 3 लाख 5 हजार 343, अलिबागमध्ये 3 लाख 9 हजार 580, श्रीवर्धनमध्ये 3 लाख 62 हजार 680, तर महाडमध्ये 2 लाख 95 हजार 449 मतदार आहेत. प्रारूप यादीत पात्र मतदाराचे नाव आढळून न आल्यास 31 ऑगस्ट ते 30 सप्टेंबर 2026 या कालावधीत संबंधित मतदार नोंदणी अधिकाऱ्यांकडे दावा किंवा हरकत दाखल करता येणार आहे. नाव समाविष्ट करण्यासाठी नमुना 6, नोंदीत दुरुस्तीसाठी नमुना 8, तर चुकीची नोंद वगळण्यासाठी नमुना 7 भरता येणार आहे.

मतदार नोंदणी अधिकाऱ्यांकडून दावे-हरकतींवर 31 ऑगस्ट ते 29 ऑक्टोबर या कालावधीत सुनावणी घेऊन निर्णय करण्यात येणार आहे. त्यानंतर 4 नोव्हेंबर 2026 रोजी अंतिम मतदार यादी प्रसिद्ध होणार आहे. अचूक, अद्ययावत आणि सर्वसमावेशक मतदार यादी तयार करण्यासाठी नागरिकांनी प्रारूप मतदार यादी तपासून आवश्यक दावे व हरकती विहित मुदतीत दाखल कराव्यात, असे आवाहन जिल्हाधिकारी किशन जावळे यांनी केले.