वेडींग प्लॅन करुन देण्याच्या बहाण्याने फसवणूक

| पनवेल | वार्ताहर |

गोवा येथील हॉटेलमध्ये वेडींग प्लॅन करुन देण्याच्या बहाण्याने एका महिलेने नववधु असलेल्या वकील तरुणीकडून 4 लाख रुपये उकळून तिची फसवणूक केल्याचे उघडकीस आले आहे. मीनाक्षी भालेराव उर्फ मीनाक्षी जाधव असे महिला वकीलाची फसवणूक करणार्‍या महिलेचे नाव असून पनवेल शहर पोलिसांनी तिच्या विरोधात फसवणुकीचा गुन्हा दाखल करुन पुढील तपासाला सुरुवात केली आहे. दरम्यान, आरोपी महिलेने अशाच पध्दतीने अनेकांची फसवणूक केल्याचे बोलले जात आहे.

या प्रकरणातील तक्रारदार तरुणी व्यवसायाने वकील असून मार्च महिन्यामध्ये तिचा विवाह ठरला होता. वकील तरुणीच्या आई-वडिलांनी तिचे लग्न गोवा येथे करण्याचे निश्चित केल्यानंतर ती आणि तिचा होणारा पती या दोघांनी गोवा वेडींग प्लॅनरचा शोध सुरु केला होता. यादरम्यान वकील तरुणीच्या आई- वडिलांच्या संपर्कात असलेल्या मीनाक्षी भालेराव उर्फ मीनाक्षी जाधव हिच्याकडे त्यांनी डेस्टीनेशन वेडिंगकरिता वेडींग प्लॅनरची चौकशी केली. त्यावेळी मीनाक्षी हिने गोव्यामध्ये तिचे अनेक हॉटेलमध्ये संपर्क असल्याचे सांगितले. तसेच त्यांना कमीत कमी पैशात गोवा येथे वेडींग प्लॅन करुन देण्याचे आश्वासन दिले. त्यानंतर मीनाक्षीने वकील तरुणीला आणि तिच्या होणार्‍या पतीला अनेक हॉटेलची माहिती देऊन त्याचे रेटकार्ड सुध्दा दाखवून त्यांचा विश्वास संपादन केला. मे महिन्यामध्ये मीनाक्षी हॉटेल बघण्याच्या बहाण्याने कुटुंबासह गोवा येथील प्लॅनेट हॉलीवुड हॉटेलमध्ये गेली होती. तेथून व्हिडीओ कॉल करुन तिने वकील तरुणीच्या आईला हॉटेल दाखवले. तसेच 12 लाख रुपयांमध्ये 2 दिवसासाठी सदर हॉटेल मिळत असल्याचे सांगून त्यांना लवकरात लवकर बुक करण्यास सांगितले. तसेच 4 लाख रुपये अ‍ॅडव्हॉन्स देण्याची मागणी केली. यावेळी मीनाक्षीच्या बोलण्यावर विश्वास ठेवून वकील तरुणीने तिला प्रथम 2 लाख आणि नंतर 1.67 लाख रुपये पाठवून दिले. त्यांनतर मीनाक्षीने वकील तरुणीचे फोन घेण्यास टाळाटाळ सुरु केली. त्यामुळे वकील तरुणीने गोवा येथील प्लॅनेट हॉलीडे हॉटेलमध्ये संपर्क साधून तिच्या लग्नाच्या बुकींगबाबत चौकशी केली. त्यावेळी त्यांच्याकडे बुकींग झाली नसल्याचे सांगण्यात आले. त्यानंतर मीनाक्षी हिने फसवणूक केल्याचे लक्षात आल्यानंतर वकील तरुणीने मीनाक्षीकडे त्याबाबत जाब विचारला असता, तिने आपली चुक कबूल करुन त्यांच्याकडून घेतलेले पैसे परत करण्याचे आश्वासन दिले. तसेच जुलै महिन्यात 5 हजार रुपये परत केले. मात्र, त्यानंतर मीनाक्षीने उर्वरीत पैसे देण्यास टाळाटाळ सुरु केली. अखेर या वकील तरुणीने पनवेल शहर पोलीस ठाण्यात तक्रार दाखल केली.