उरण बाह्यवळण मार्ग भूसंपादन रखडले

। उरण । वार्ताहर ।

वाहतूक कोंडीवर महत्त्वपूर्ण उतारा असलेल्या उरण बाह्यवळण मार्गात नगर परिषद हद्दीतील जमिनीच्या भूसंपादनाचा अथडळा निर्माण झाला आहे. यासाठी लागणारा निधीही उपलब्ध नसल्याने हा मार्ग पूर्णत्वास येण्यासाठी 2025 साल उजाडण्याची शक्यता आहे. त्यामुळे उरणच्या प्रवासी व नागरिकांना आणखी काही महिने या मार्गाची प्रतीक्षा करावी लागणार आहे.

उरण शहर आणि परिसराचे झपाट्याने नागरीकरण सुरू आहे. उरण हे लोकल, रस्ते मार्ग, जलमार्ग यांनी जोडले गेले आहे. त्यामुळे नागरी वस्ती वाढू लागली आहे. त्यामुळे शहरातील वाहनामुळे होणार्‍या वाहतूक कोंडीत भर पडली आहे. उरणच्या सर्व मार्गांवर सततच्या कोंडीने प्रवासी, नागरिक आणि वाहनचालक त्रस्त झाले आहेत.

उरण बाह्यवळण मार्गाचा प्रस्ताव 2001 साली उरण शहरातील वाहतूक कोंडीवर उपाय म्हणून शहराला जोडणार्‍या उरण पनवेल या मुख्य मार्गालगत मोरा मार्गाला जोडणारा बाह्यवळण मार्ग प्रस्तावित होता. त्याचे भूमिपूजनही करण्यात आले, मात्र त्याची अंमलबजावणी झाली नाही. या मार्गात कांदळवन असल्याने त्यांच्या परवानग्या मिळण्यासाठी अनेक वर्षे लागली. त्यामुळे या मार्गाच्या खर्चात वाढ झाली. या मार्गाच्या उभारणीसाठी आवश्यक जमिनीसाठी शासनाने निधी उपलब्ध करून द्यावा यासाठी प्रयत्न करीत आहेत. मात्र सध्या सिडकोच्या माध्यमातून तयार करण्यात येणार्‍या या एलिव्हेटेड मार्गाचे काम वेगाने सुरू आहे. या मार्गाला जोडणार्‍या उरण नगर परिषद हद्दीतील भूखंडावर घरे आहेत. त्यासाठी पनवेलच्या उपविभागीय अधिकार्‍यांकडून येथील जमिनीच्या अधिग्रहणाची प्रक्रिया सुरू आहे. मात्र त्यासाठी लागणारा निधी मिळावा याकरिता शासनदरबारी प्रयत्न सुरू आहेत.

उरणच्या बाह्यवळण मार्गासाठी जमीन संपादनाची प्रक्रिया सुरू आहे. या भूखंडावर कुळांची घरे आहेत. यासाठी निधी उपलब्ध झाल्यानंतर या मार्गाचे काम पूर्ण होईल.

– समीर जाधव, मुख्याधिकारी, उरण