मुबंई-पुणे एक्सप्रेसवेवर खाजगी बसची ट्रकला धडक

10 प्रवाशी गंभीर जखमी

। खोपोली । प्रतिनिधी।

मुबंई-पुणे एक्सप्रेसवेवर शनिवारी (दि. 09) पहाटे बोरघाटात बसने समोरील बंद उभ्या असलेल्या ट्रकला जोरदार धडक दिली. या अपघातात बसमधील 10 प्रवाशी गंभीर जखमी झाले आहेत. यात कोल्हापूर येथून फुटबॉल ट्रॉफी जिंकून परतणारी टीम जखमी झाली आहे.

मुबंई-पुणे एक्सप्रेसवेवरून खाजगी बस प्रवासी घेऊन कोल्हापूर येथून मुबंईकडे जात होती. दरम्यान, बस बोरघाटातील नवीन बोगद्यात आली असता चालकाचे बसवरील नियंत्रण सुटले आणि त्याने समोरील उभ्या असलेल्या ट्रकला पाठीमागून जोरदार धडक दिली. या अपघातात बसमध्ये एक व्यक्ती अडकून गंभीर जखमी झाली, तर अन्य 10 प्रवाशी गंभीर जखमी झाले आहेत. यात जखमी झालेल्या फूटबॉल टीममधील चार मुलींना एमजीएम रुग्णालयात दाखल करण्यात आले आहे.

या अपघाताची माहिती मिळताच खोपोली पोलीस, बोरघाट पोलीस, देवदूत यंत्रणा, अपघातग्रस्त टीमचे सदस्य तात्काळ घटनास्थळी दाखल होऊन बसमधील अडकेल्या प्रवाशांना तात्काळ बाहेर काढले. जखमींना पुढील उपचारासाठी एमजीएम रुग्णालयात दाखल करण्यात आले आहे. तर घटनेतील दोन्ही अपघातग्रस्त वाहने क्रेनच्या साहाय्याने बाजूला घेऊन एक्सप्रेसवे वाहतुकीसाठी चालू करण्यात आला आहे.