शेतकरी हाच खरा विकासक- अतुल म्हात्रे

। गडब । वार्ताहर ।

रायगड जिल्ह्यातील पेण तालुक्यात अनेक प्रकल्प येऊ पाहत आहेत. मात्र, हे प्रकल्प येत असताना शेतकर्‍यांना किंवा भूमिपुत्रांना विश्‍वासात न घेता सक्तीचे संपादन करण्याचे काम शासनामार्फत सुरु आहे. तसे न होता ज्या ठिकाणी प्रकल्प येणार असेल त्या ठिकाणच्या शेतकर्‍याला किंवा भूमिपुत्राला केंद्रस्थानी ठेवून, त्याला विश्‍वासात घेऊन प्रकल्प प्रस्थापित होणे गरजेचे आहे. असे प्रतिपादन पेण विधानसभा मतदार संघाचे शेकापचे उमेदवार अतुल म्हात्रे यांनी वडखळ डोलवी येथे प्रचार फेरीत केले.

पेण विधानसभा मतदार संघातील शेकापचे उमेदवार अतुल म्हात्रे यांच्या प्रचारार्थ वडखळ नवेगाव, डोलवी परिसरात रॅली काढण्यात आली होती. या प्रचार रॅलीचा शुभारंभ वडखळ येथील गणेश मंदीरात श्रीफळ वाढवुन करण्यात आला. यावेळी अतुल म्हात्रे यांनी बोलताना सांगितले की, शेतकरी हाच खरा विकासक बनला पाहिजे. ही भूमिका आम्ही घेऊनच शेतकर्‍यांना न्याय मिळवून देण्यासाठी आम्ही पुढे सरसावलो आहोत. गेले अनेक वर्ष झाली, येथील प्रस्थापितांनी अजून देखील पाण्याचा प्रश्‍न सोडवलेला नाही. मात्र, येथील जनतेला माझ्याकडून अपेक्षा आहे की हा प्रश्‍न मी कायमचा सोडवावा. आणि मी कबुली देतो की हा प्रश्‍न मुळापासून सोडवणार असल्याचे त्यांनी सांगितले.

पुढे बोलताना ते म्हणाले की, पाण्याबरोबरच या विभागातल्या युवकांच्या रोजगाराच्या समस्येवरती देखील मी काम करणार आहे. तसेच, या विभागात वाड्या-वस्त्या गावांपासून दूर आहेत. त्यांना मूळ प्रवाहात आणण्यासाठी प्रयत्न करणार आहे. शेतावर आणि वाड्यांवर जी घर आहेत तेथे अजून देखील गाडी पोहोचत नाही. रस्ते झालेले नाहीत. पाण्याची कुठली सुविधा नाही. या ज्या काही समस्या आहेत या समस्यांवर कायमचा तोडगा काढून येथील परीसर सुजलाम सुफलाम करणार असल्याचे अतुल म्हात्रे यांनी सांगितले. यावेळी माजी बांधकाम सभापती संजय जांभळे, कॉगेस तालुकाअध्यक्ष अशोक मोकल, ग्रामपंचायत सदस्य निलेश म्हात्रे, लक्ष्मण गांवड आदिंसह कार्यकर्ते आणि महिला मोठ्या संख्येन उपस्थित होते.