शेतकरी आक्रमक दिघी महामार्ग बंद करण्याचा पवित्रा

महाराष्ट्र रस्ते विकास मंडळाकडून शेतकर्‍यांची फसवणूक

। दिघी । । गणेश प्रभाळे ।

रायगड जिल्ह्यातील राजपुरी खाडीवर विकसित होत असलेल्या दिघी पोर्टला जोडणारा दिघी-पुणे महामार्ग म्हसळा तालुक्यातील सकलप आणि तोंडसुर या बायपास मार्गावरून काढण्यात आला आहे. मात्र, रस्ता पूर्ण होऊनही अद्याप मोबदला न मिळाल्याने बाधित शेतकर्‍यांनी आक्रमक पावित्रा घेत रास्ता रोको आंदोलनाचा इशारा दिला आहे.

दिघी पोर्टकडून होणारी अवजड वाहतूक ही म्हसळा शहरातुन होत असताना, पर्याय म्हणून पोर्ट प्रशासनाने वाहतूक सोयीसाठी तोंडसुर (बौद्धवाडी) ते श्रीवर्धन मार्गाला जोडण्याचा बायपास मार्ग बनवण्याचा आराखडा तयार केला. जमीन अधिग्रहण करण्याचे काम होऊन 2019 मध्ये रस्त्याचे कामही सुरु केले. दोन वर्षात रस्ता पूर्ण होऊन बायपास मार्ग सुरू करण्यात आला.

या रस्त्यासाठी सकलप व म्हसळा येथील बावीस शेतकर्‍यांची साधारण 58 गुंठे जमीन गेली आहे. त्यातील जवळपास आठ शेतकर्‍यांची 26 गुंठे जमीन अधिग्रहण होऊन त्याचा मोबदला अद्याप मिळाला नाही. त्यावेळी शेतकर्‍यांच्या जमिनी संपादित करताना तीन महिन्यात जमिनीचा मोबदला देण्याचे सांगितले होते, मात्र, रस्त्याचे काम पूर्ण आणि रस्ता सुरळीत सुरू होऊन चार वर्ष उलटले तरी मोबदला दिला नाही. आज येथील बाधित शेतकरी मोठ्या संकटात सापडला आहे. जमिनी गेल्या. मात्र, कुटुंबाचे शेतीवरती उदरनिर्वाह अवलंबून असल्याने हतबल झाला आहे. प्रशासनाकडून मदत मिळाली नसून अक्षरशः त्यांच्या घरादारावर नांगर चालवला गेला आहे. अशी शेतकर्‍यांनी न्यायासाठी आर्त हाक दिली आहे. परिणामी, येत्या पंधरा दिवसात जमिनीचा मोबदला मिळाला नाही तर रास्ता रोको आंदोलन करण्याचा इशारा यावेळी देण्यात आला आहे.

या प्रकरणाकडे जाणीवपूर्वक बघितलं जाईल. कार्यालयाच्या मुख्यालयात प्रस्ताव गेला आहे. माहिती घेऊन लवकरच सांगतो.

सारंग इनामदार,
अभियंता, महाराष्ट्र रस्ते विकास महामंडळ

गेली सहा वर्षे जमिनीचा मोबदला मिळावा म्हणून अधिकार्‍यांच्या मागे पाठपुरावा करत आहे. मात्र, अद्याप एक दमडी मिळाली नाही. आता तरी प्रशासनाने लक्ष घालावे.

संतोष काते,
बाधित शेतकरी.