जय वाघोबा खैरवाडी संघ विजेता
। सुकेळी । वार्ताहर ।
रोहा तालुक्यातील नागोठणे जवळच असलेल्या श्री जय हनुमान क्रिडा मंडळ वेताळवाडी येथे आयोजित केलेल्या 50 किलो वजनी गटातील ठाकुर, कातकरी, धनगर समाजातील कबड्डीच्या अंतिम सामन्यात सुकेळी खैरवाडी येथील जय वाघोबा संघाने जय हनुमान धाईरवाडी या संघांचा पराभव करत कबड्डी चषकावर आपले नाव कोरले.
सुकेळी वेताळवाडी येथे शनिवार (दि.30) ऐनघर विभाग बेरोजगार संघटनेचे उपाध्यक्ष सतिष सुटे व प्रमुख मान्यवरांच्या उपस्थितीत या स्पर्धेचे उद्घाटन झाले. आयोजित केलेल्या कबड्डी स्पर्धेत रायगड जिल्ह्यातुन जवळ जवळ 85 संघ सहभागी झाले होते. 50 वजनापर्यंत असलेल्या या सामन्यांचा थरार दुसर्या दिवशी रविवारी (दि.31) रोजी सायंकाळी 6 वाजेपर्यंत सुरू होता. यावेळी मोठ्या प्रमाणात क्रिडाप्रेमींनी कबड्डी सामन्यांचा आंनद लुटला. या सामन्यात जय वाघोबा संघ खैरवाडी संघाने प्रथम क्रमांकाचे रोख रक्कम 7 हजार रूपये व आकर्षक चषक मिळवले. तर जय हनुमान धाईरवाडी संघांला उपविजेत्या पदावर समाधान मानावे लागले. तर पेण तालुक्यातील बोरीचा माळ (अ) व बोरीचा माळ (ब) या एकाच गावातील दोन्हीं संघांना अनुक्रमे तृतिय व चतुर्थ क्रमांक पटकाविण्यात यश प्राप्त झाले. या सामन्यात सामनावीर म्हणून खैरवाडी संघांचा आकाश वारगुडे, उत्कृष्ट पक्कड उमेश हंबीर, तर उत्कृष्ट चढाई म्हणुन समिर दोरे या खेळाडूंना चषक देऊन गौरविण्यात आले.