जयंत पाटील यांना माधवराव गायकवाड जीवनगौरव पुरस्कार जाहीर

| मनमाड | प्रतिनिधी |

शेतकरी, राजकीय, सहकार चळवळीतील, योगदानाबद्दल स्वातंत्र्य सैनिक दि. कॉ. माधवराव गायकवाड यांच्या नावाचा जीवनगौरव पुरस्कार 2025 ज्येष्ठ साम्यवादी नेते, शेकाप सरचिटणीस जयंत पाटील यांना जाहीर करण्यात आला आहे. स्मृती चिन्ह, गौरवपत्र ,शाल देऊन सन्मानित केले जाणार आहे. पुरस्कार वितरण सोहळा नोव्हेंबर महिन्यात अलिबाग येथे कॉ. माधवराव गायकवाड बाबूजी स्मृती दिनी मान्यवरांच्या उपस्थितीत प्रदान करण्यात येणार असल्याची माहिती आयोजकांनी दिली.

भारतीय कम्युनिस्ट पक्षाचे ज्येष्ठ नेते, स्वातंत्र्य सेनानी, संयुक्त महाराष्ट्र आंदोलनाचे नेते, खंडकरी शेतकऱ्यांना न्याय मिळवून देणारे माजी आमदार कॉम्रेड माधवराव गायकवाड यांचे 12 नोव्हेंबर 2018 रोजी वयाच्या 94 व्या वर्षी निधन झाले. कॉम्रेड माधवराव गायकवाड यांचे कार्य शेतकरी, स्वातंत्र्य चळवळीत, खंडकरी शेतकरी प्रदिर्घ लढ्यातून जमीन मिळवून दिली आहे. कॉम्रेड माधवराव गायकवाड (बाबूजी) यांचा विचाराचा वारसा व कार्य पुढे नेण्यासाठी स्वातंत्र्य सैनिक कॉम्रेड माधवराव गायकवाड बहुउद्देशीय संस्था स्थापन करण्यात आली आहे. संस्थेच्यावतीने सामाजिक, शैक्षणिक शेती, सहकार चळवळ, कामगार क्षेत्र आदी संदर्भात उपक्रम राबविले जातात. कॉम्रेड माधवराव गायकवाड यांच्या 7 व्या स्मृतीदिनी जीवनगौरव पुरस्कारसाठी ज्येष्ठ कम्युनिस्ट साम्यवादी नेते, शेकापचे सरचिटणीस जयंत पाटील यांची निवड केली आहे. हा पुरस्कार नोव्हेंबर महिन्यात अलिबाग येथे कॉ. माधवराव गायकवाड बाबूजी स्मृती दिनी मान्यवरांच्या उपस्थितीत प्रधान करण्यात येणार आहे. या आधी हा पुरस्कार खा. राजू शेट्टी, कॉ. एम.ए. पाटील, कॉ . अण्णासाहेब थोरात, कॉ. मोहन शर्मा, कॉ. तुकाराम भस्मे, कॉ. सूकुमार दामले, माजी मंत्री बाळासाहेब थोरात, डॉ. भालचंद्र कांगो यांना देण्यात आला आहे. अशी माहिती नाशिक येथे संस्थेच्या अध्यक्षा ॲड. कॉम्रेड साधना गायकवाड, सचिव कॉ. राजू देसले यांनी दिली.