अल्पवयीन इराणी चोरट्याचा हैदोस

प्रवाशाने गमावला डावा पाय

| कल्याण | प्रतिनिधी |

लोकलच्या दारात उभे असताना रुळांलगत असलेल्या चोरट्यांकडून फटका मारुन मोबाईल हिसकावण्याचे प्रकार मध्य रेल्वेवर पुन्हा वाढले आहेत. त्यामुळे रेल्वेच्या प्रवाशांमध्ये ‌‘फटका गँग’ची मोठी दहशत निर्माण झाली आहे. अशातच रविवारी नाशिकच्या एका तरुणाचा फटका गँगमुळे पाय मोडला. तपोवन एक्स्प्रेसने प्रवास करत असताना एका चोरट्याने फटका मारुन मोबाईल हिसकावण्याचा प्रयत्न केला. या हल्ल्यात तरुण एक्स्प्रेसमधून खाली पडला. चोरट्याने रुळांशेजारी पडलेल्या तरुणाला माराहाण करुन त्याच्याकडील पैसे आणि मोबाईल लांबवला. त्यानंतर पोलिसांनी काही तासांतच आरोपीला अटक केली.

नाशिक येथील गौरव निकम (26) कामानिमित्ताने ठाण्यात आला होता. त्याने ठाण्याहून नाशिकला जाण्यासाठी तपोवन एक्स्प्रेस पकडली. शहाड आणि आंबिवली स्थानकांदरम्यान एका अज्ञाताने अचानक त्याच्या हातावर फटका मारला आणि त्याचा मोबाईल हिसकावण्याचा प्रयत्न केला. या हल्ल्यात गौरव खाली पडला आणि जबर जखमी झाला. गौरव वेदनेने तडफडत असतानाही 16 वर्षीय आरोपी त्याच्याजवळ आला आणि त्याच्या खिशातून फोन आणि 20 हजार रुपये हिसकावून घेतले. गौरवने प्रतिकार केला तेव्हा त्याला जबर मारहाण करण्यात आली. कल्याण रेल्वे पोलिसांना गौरवला उपचारासाठी कल्याणमधील रेल्वे रुग्णालयात दाखल केले. मात्र, परिस्थिती गंभीर असल्याने त्याला एका खासगी रुग्णालयात हलवण्यात आले. त्यानंतर कल्याण रेल्वे पोलिसांनी आंबिवलीतील इराणी पाडा येथून अल्पवयीन आरोपीला ताब्यात घेतले. आंबिवली रेल्वे स्थानकाच्या ट्रॅकला लागून असलेला इराणी पाडा हा चोरी आणि साखळी चोरीच्या घटनांसाठी कुप्रसिद्ध आहे. स्थानिक गुन्हेगारांच्या पूर्वीच्या अटकेमुळे अशा गुन्ह्यांना तात्पुरते थांबविण्यात आले होते; परंतु, अलीकडेच घटना पुन्हा सुरू झाल्या आहेत.