लाखो रुपयांचे एमडी जप्त

| उरण | प्रतिनिधी |

नवी मुंबईतील एपीएमसी पोलीस ठाणे हद्दीत गस्ती पोलिसांनी एका युवकाला अटक केली आहे. त्याच्याकडून 2 लाख 80 हजार रुपयांचे एमडी हा अंमली पदार्थ जप्त करण्यात आला आहे. ही कारवाई अंमली पदार्थ विरोधी पथकाने केली असून, याप्रकरणी एपीएमसी पोलीस ठाण्यात गुन्हा दाखल करण्यात आला आहे.

मिळालेल्या माहितीनुसार, रमजान इमाम शेख (25) असे अटक करण्यात आलेल्या संशयित आरोपीचे नाव आहे. तो तुर्भे इंदिरानगर येथील रहिवासी असून, बुधवारी (दि.22) रात्रीच्या सुमारास अंमली पदार्थ टास्क फोर्सचे गस्ती पथक एपीएमसी पोलीस ठाणे हद्दीत गस्त घालत होते. त्यावेळी तुर्भे सेक्टर 19 पामबीच लगत असणाऱ्या महापारेशन कार्यालयासमोर रमजान त्यांना दिसून आला. त्याच्या हालचाली संशयित वाटल्याने गस्त पथकाने त्याला हटकले असता तो घाबरला. मात्र, उसने अवसान आणून उडवाउडवीची उत्तरे देत होता. त्याच्या बोलण्यात विसंगती आल्याने पोलिसांनी त्याला पकडून एपीएमसी पोलीस ठाण्यात आणले. त्या ठिकाणी त्याची अंगझडती घेतली असता, त्याच्याकडे पांढऱ्या रंगाची भुकटी आढळून आली. त्याची तपासणी केली असता तो एडी हा अंमली पदार्थ असल्याचे समोर आले. त्यामुळे त्याच्याविरोधात अंमली पदार्थ विरोधी कायाद्यांतर्गत गुन्हा नोंद करीत रमजान याला तात्काळ अटक करण्यात आली आहे. त्याच्याकडे 28 ग्रॅम वजनाचा 2 लाख 80 किमतीचा एमडी हा अंमली पदार्थ, 4 हजार रुपयांचा मोबाईल, 5 हजार 710 रुपयांची रोकड असा एकूण 2 लाख 89 हजार 710 रुपयांचा ऐवज जप्त करण्यात आला आहे. रमजानने हा अंमली पदार्थ कोठून आणि कोणासाठी आणला याची चौकशी सुरु आहे, अशी माहिती पोलिसांनी दिली.