रायगडात सुक्या म्हावऱ्याची चलती

अगोटीसाठी खरेदीची लगबग

| पाली/बेणसे | धम्मशील सावंत |

पावसाळा काही दिवसांवर येऊन ठेपला आहे. 1 जूनपासून दोन महिने पावसाळ्यात मासेमारी बंद असते. पावसाळ्यातील बेगमीसाठी सुकी मासळी हक्काची जिन्नस आहे. आणि मग यावेळी मांसाहारी खाणाऱ्यांना सुक्या मासळीचा उत्तम पर्याय असतो. त्यामुळेच या दिवसांत सुकी मासळी खरेदी व साठवण करण्याची अनेक जणांची लगबग सुरु आहे. शिवाय, भावदेखील स्थिर आहेत. परिणामी, खवय्ये सुकी मासळी खरेदीची घाई करत आहेत.

मागील वर्षी मे महिन्यात सुरू झालेला अवकाळी पाऊस आणि त्याचबरोबर लांबलेला पाऊस यामुळे सुक्या मासळीची कमतरता होती. शिवाय, भावदेखील प्रचंड वधारले होते. मात्र, यंदा सुक्या मासळीचे भाव स्थिर आहेत. सध्या आगोटीची लगबग सुरु असून, जिल्ह्यातील आठवडा बाजार व मासळी बाजारात सुकी मासळी खरेदीसाठी रेलचेल सुरु आहे. पावसाळ्याच्या चार महिन्यांत भाजीपाला व मासळी यांची आवक कमी होते. आणि, त्यांचे भावदेखील वधारतात. अशा वेळी घरात साठवून ठेवलेली सुकी मासळी काढली की मग जेवण चांगले जाते.

सुकी मासळीचे भाव प्रतिकिलो
1) साधे सोडे - 1200 ते 1600 रुपये
2) उच्च दर्जाचे सोडे - 1800 ते 2000 रुपये
3) बांगडा - 20 व 25 रुपये 1 नग
4) अंबाडी- दर्जानुसार 500, 600 व 700 रुपये
5) सुकट - दर्जानुसार साधी 200, चांगली 300 व 350 रुपये
6) बोंबील - 500 रुपये.
7) खाडीचे बोंबील साईजनुसार 600 ते 800 रुपये
8) माकुल - आत्ता 700 ते 800 रुपये. पण आवक कमी असल्याने उपलब्ध होत नाहीत.
9) पांढरी मोठी वाकटी - 600 ते 700 रुपये
10) छोटी वाकटी - 400 रुपये
11) मांदेली - आत्ता 200 रुपये.
12) मासे सुकट/ दांडी सुकट (खारे) साधे 400, उत्तम 500 रुपये
13) रेपटी - 400 रुपये
14) सुरमई - छोटी 600 मोठी 800 रुपये
15) ढोमी - 300 रुपये