काळ्या ढगांनी उगवत्या सूर्याला घातला वेढा

सकाळच्या निसर्गरम्य दृश्याने नागरिक मंत्रमुग्ध

| पनवेल | प्रतिनिधी।

आज सकाळी सुमारे सात वाजण्याच्या सुमारास आकाशात एक अनोखे आणि मनमोहक दृश्य पाहायला मिळाले. उगवत्या सूर्याला चारही बाजूंनी काळ्या ढगांनी वेढा घातल्याचे चित्र दिसत होते. जणू सूर्याची सोनेरी किरणे बाहेर पडण्यासाठी मार्ग शोधत होती. मात्र, काळ्या ढगांनी एकजूट दाखवत सूर्याला पुन्हा- पुन्हा आपल्या कवेत घेतले होते.

आकाशात सुरू असलेल्या या निसर्गाच्या अनोख्या खेळामुळे वातावरणात वेगळीच रंगत निर्माण झाली होती. काही क्षण सूर्यकिरण ढगांमधून बाहेर पडत आकाश उजळून टाकत होते, तर पुढच्याच क्षणी काळे ढग पुन्हा त्यावर सावली करत होते. त्यामुळे आकाशात प्रकाश आणि अंधाराचा सुंदर संगम पाहायला मिळाला.
सकाळच्या या दृश्याने मॉर्निंग वॉकसाठी बाहेर पडलेले नागरिक, ज्येष्ठ नागरिक तसेच छायाचित्रकार विशेष आकर्षित झाले. अनेकांनी आपल्या मोबाईल आणि कॅमेऱ्यात या निसर्गरम्य क्षणांचे फोटो आणि व्हिडीओ कैद केले. गेल्या काही दिवसांपासून वाढलेल्या उष्णतेनंतर आज सकाळी ढगाळ वातावरणामुळे काहीसा गारवा जाणवत होता. त्यामुळे नागरिकांमध्ये समाधान व्यक्त होत असून, येत्या काही दिवसांत पावसाची चाहूल लागण्याची शक्यता व्यक्त केली जात आहे.