नेरळमधील नळजोडणी गैरव्यवहार कायम

ग्रामपंचायत अधिकारी, कर्मचाऱ्यावर कारवाईची मागणी

| नेरळ | प्रतिनिधी |

कर्जत तालुक्यातील नेरळ ग्रामपंचायतीतील प्रशासक राजवटीत भ्रष्टाचार वाढतच आहे. लोकनियुक्त जिल्हा परिषद आणि पंचायत समिती सदस्य यांच्याकडून तब्बल 43 अवैद्य नळजोडण्यांचा गैरव्यवहार उघड झाल्यानंतर देखील पाणी पुरवठा विभाग सुधारण्याचे नाव घेत नाही. कर्जत पंचायत समितीचे सदस्य भगवान चंचे यांनी आणखी एक नळजोडणी उघडकीस आणली असून, त्याबाबत ग्रामपंचायत अधिकारी आणि कर्मचाऱ्यावर कारवाई करण्याची मागणी केली आहे. दरम्यान, गटविकास अधिकारी यांनी ग्रामपंचायत अधिकारी अरुण कार्ले यांच्यावर नियमानुसार कार्यवाही व्हावी, असे आदेश दिले आहेत. त्यामुळे या अवैध नळजोडणी प्रकरणी गटविकास अधिकारी कोणती कारवाई करतात, याकडे सर्वांचे लक्ष लागले आहे.

मागील तीन-चार महिन्यांत नेरळ ग्रामपंचायतीमध्ये असलेल्या प्रशासक राजवटीत अवैध नळजोडणी करण्याचे अनेक प्रकार उघडकीस आले आहेत. तसेच, 5 लाखांच्या कचरा कुंड्या लपवून ठेवण्याचा प्रकार देखील जिल्हा परिषद आणि पंचायत समितीच्या सदस्यांनी उघडकीस आणल्या आहेत. त्यात मागील तीन महिन्यांत तब्बल 43 नळजोडण्यांची कोणतीही नोंद नसल्याने त्या नळजोडण्या कापून टाकण्यात आल्या आहेत. त्यानंतर देखील नेरळ ग्रामपंचायतीतील कर्मचारी आणि ग्रामपंचायत अधिकारी यांच्या कार्यपद्धतीत सुधारणा होत नसल्याने नेरळ ग्रामपंचायत ही भ्रष्टाचाराचे कुरण बनले असल्याचे सिद्ध झाले आहे.

नुकताच कर्जत पंचायत समितीच्या सदस्यांनी पाणी पुरवठा विभागाचा आणखी एक प्रताप समोर आणला आहे. या विभागाच्या कर्मचाऱ्यांनी कोणत्याही प्रकारची परवानगी न घेता 35 हजार रुपयांच्या आमिषावर नळजोडणी दिली होती. ती नळजोडणी देताना नेरळ ग्रामपंचायतीची पाणी जोडणी मंजुरी देखील नसल्याची माहिती मिळताच कर्जत पंचायत समितीचे सदस्य भगवान चंचे यांनी ग्रामपंचायत कार्यालय गाठले. संबंधित नळजोडणी बाबत चंचे यांनी ग्रामपंचायत अधिकारी अरुण कार्ले यांच्याकडे परवाना पत्राची मागणी केली. मात्र, कोणत्याही प्रकारचे परवाना पत्र नसताना आणि ग्रामपंचायत पाणी पुरवठा विभागात त्या नळजोडणीची नोंद नसल्याने तत्काळ संबंधित नळजोडणी कापण्यास सांगितले. तसेच, ग्रामपंचायत अधिकारी अरुण कार्ले यांनी पाणी पुरवठा कर्मचाऱ्यावर कारवाई करावी, अशी मागणी देखील केली. परंतु, कोणतीही कारवाई केली जात नसल्याने भगवान चंचे हे कर्जत पंचायत समितीमध्ये पोहचले आणि गट विकास अधिकारी सुशांत पाटील यांची भेट घेतली. या भेटीप्रसंगी जिल्हा परिषद सदस्य सुनीता मोरे, तसेच राष्ट्रवादी काँग्रेस आणि शिवसेना ठाकरे पक्षाचे कार्यकर्ते हे देखील उपस्थित होते. यावेळी भगवान चंचे यांनी, प्रशासक सुजित धनगर आणि ग्रामपंचायत अधिकारी अरुण कार्ले यांच्या बाबत गटविकास अधिकाऱ्यांनी अवैध नळजोडणी प्रकरणी कारवाई करण्याची मागणी केली.गटविकास अधिकारी यांनी नियमानुसार कारवाई करण्यात येईल असे आश्वासन दिले असून, मागील दोन महिन्यांपूर्वी उघडकीस आलेला 43 नळजोडणीच्या भ्रष्टाचाराबाबत कधी कारवाई करणार, असा सवाल भगवान चंचे यांनी उपस्थित केला आहे.