अल्पवयीन मुलींना वेश्याव्यवसायात ढकलणाऱ्या महिलेला अटक

| पनवेल । प्रतिनिधी ।

उलवा परिसरात अल्पवयीन मुलींना पैशांच्या आमिषाने वेश्याव्यवसायात ढकलल्याचा धक्कादायक प्रकार उघडकीस आला असून, या प्रकरणी एका महिला दलालाविरुद्ध गंभीर गुन्हा दाखल करण्यात आला आहे. उलवा पोलिसांनी कारवाई करत आरोपी महिलेला अटक केली असून, न्यायालयाच्या आदेशानुसार पुढील तपास सुरू आहे.

पोलिसांनी दिलेल्या माहितीनुसार, सेक्टर 19 मधील एका लॉजमध्ये अल्पवयीन मुलींना ग्राहकांसाठी उपलब्ध करून दिले जात असल्याची माहिती मिळाल्यानंतर सापळा रचण्यात आला. छापेमारी दरम्यान दोन अल्पवयीन मुलींची सुटका करण्यात आली. प्राथमिक चौकशीत आरोपी महिला स्वतःच्या आर्थिक फायद्यासाठी मुलींना देहव्यापारासाठी प्रवृत्त करत असल्याचे समोर आले आहे. या प्रकरणी गुन्हा दाखल करण्यात आला आहे.

अल्पवयीन मुलींच्या शोषणाशी संबंधित गंभीर स्वरूपाच्या कलमांचा समावेश असल्याने या प्रकरणाला विशेष महत्त्व प्राप्त झाले आहे. कारवाईदरम्यान पोलिसांनी रोख रक्कम, मोबाईल फोन आणि इतर साहित्य असा सुमारे 38 हजार रुपयांचा मुद्देमाल जप्त केला आहे. या रॅकेटमागे आणखी कोणाचा सहभाग आहे का, तसेच मुलींना या व्यवसायात आणण्यासाठी कोणते जाळे कार्यरत होते, याचा तपास पोलीस करत आहेत. उलवा पोलीस ठाण्याचे वरिष्ठ अधिकारी यांच्या मार्गदर्शनाखाली ही कारवाई करण्यात आली असून, अल्पवयीन मुलांच्या सुरक्षिततेशी संबंधित गुन्ह्यांबाबत पोलिसांचा कठोर दृष्टिकोन कायम राहणार असल्याचे स्पष्ट करण्यात आले आहे.