तळोजातून कोट्यवधींचा गुटखा जप्त

| पनवेल | प्रतिनिधी |

शासनाने प्रतिबंधित केलेल्या सुगंधी पानमसाला आणि गुटख्याची बेकायदेशीर वाहतूक व साठवणूक करणाऱ्या मोठ्या आंतरराज्य रॅकेटचा नवी मुंबई पोलिसांच्या गुन्हे शाखेने पर्दाफाश केला आहे. तळोजा येथे करण्यात आलेल्या या कारवाईत पोलिसांनी सुमारे 65 लाख रुपये किंमतीचा सुगंधी पानमसाला, गुटख्याचा साठा आणि 40 लाख रुपये किंमतीची 3 वाहने असा तब्बल 1 कोटी 5 लाख 63 हजार रुपये किंमतीचा मुद्देमाल जप्त केला आहे.

तळोजा येथील धरणा गाव येथे शासनाने प्रतिबंधित केलेल्या सुगंधी पानमसाला आणि गुटख्याचा मोठा साठा नवी मुंबई आणि मुंबई परिसरात वितरीत करण्यासाठी आणण्यात आल्याची माहिती गुन्हे शाखेला मिळाली होती. या माहितीच्या आधारे गुन्हे शाखा युनिट 1च्या पथकाने दि.10 जुलै रोजी सकाळी तळोजा येथील धरणा गाव येथील नाटली कंपाऊंडमध्ये छापा टाकला. यावेळी या ठिकाणी मोठ्या आयशर टेम्पोसह 2 मारुती सुझुकी सुपर कॅरी टेम्पोमध्ये गुटख्याचा साठा भरण्याचे काम सुरु असल्याचे निदर्शनास आले. यावेळी पोलिसांनी त्या ठिकाणावरुन महाराष्ट्र राज्यात प्रतिबंधीत असलेला 48 लाख 60 हजार रुपये किंमतीचा प्रिमीयम राजनिवास सुगंधित पान मसाला आणि प्रिमीअम झेड एन-1 जाफराणी जर्दा, तसेच 20 लाख रुपये किंमतीचा आयशर प्रो 3015 टेम्पो आणि प्रत्येकी 10 लाख रुपये किंमतीचे 2 मारुती सुझुकी सुपर कॅरी टेम्पो जप्त केले. तसेच, करण राम साळुंखे, दर्शन उर्फ जग्गू ओमप्रकाश कुमार आणि विनोदकुमार प्रभुराम प्रजापती या तिघांना अटक केली. त्यानंतर पोलिसांनी तिघांची कसून चौकशी केली असता, करण साळुंखे याने तळोजा घोट कॅम्प येथील निलकमल रेसीडेन्सीतील गाळ्यामध्ये गुटख्याचा साठा लपवून ठेवल्याची माहिती मिळाली. त्यानुसार पोलिसांनी गाळा नं-2 मधून तब्बल 16 लाख रुपये किंमतीचा महाराष्ट्र राज्यात प्रतिबंधीत असलेला सुगंधी पानमसाला आणि गुटख्याचा साठा जप्त केला. अशा प्रकारे गुन्हे शाखेने या कारवाईत एकूण 1 कोटी 5 लाख 63 हजार रुपये किंमतीचा मुद्देमाल जप्त केला आहे. या प्रकरणी तळोजा पोलीस ठाण्यात 7 आरोपींविरुध्द गुन्हा दाखल करण्यात आला असून, 4 फरार आरोपींचा पोलिसांकडून शोध घेण्यात येत आहे.