Crime News: तरूणींकडून तरुणावर कोयत्याने हल्ला

| पुणे | प्रतिनिधी |

पुण्यात फ्लाईंग जिप्सी हॉटेलमध्ये शनिवारी (दि.15) पहाटे चारच्या सुमारास एका तरुणावर कोयत्याने हल्ला झाल्याची घटना घडली आहे. रील बनवण्याच्या आणि कमेंटच्या वादातून हा प्रकार घडल्याचे सांगण्यात येत आहे. या हल्ल्यात अथर्व जगताप नावाचा 19 वर्षीय तरुण गंभीर जखमी झाला आहे. डेक्कन पोलीस ठाण्याच्या हद्दीत असणाऱ्या फ्लाईंग जिप्सी हॉटेलमध्ये ही घटना घडली. या प्रकरणी दोन तरुणींसह तीन संशयितांची ओळख पटवण्यात आली आहे.

मिळालेली माहितीनुसार, अथर्व जगताप आणि त्याचे मित्र फ्लाईंग जिप्सी हॉटेलमध्ये बसले होते. त्यावेळी संशयितांनी हॉटेलमध्ये घुसून अथर्ववर कोयत्याने वार केले. ही घटना येथील सीसीटीव्हीत कैद झाली आहे. या फुटेजमध्ये दोन मुली स्पष्टपणे दिसत आहेत. जखमी अथर्ववर ससून रुग्णालय आणि दीनानाथ मंगेशकर रुग्णालयात वैद्यकीय उपचार करण्यात आले आहेत. पोलिसांनी आतापर्यंत माधवी कुंभार, स्नेहल सोनके आणि शार्दूल ओव्हाळ या तीन संशयितांची ओळख पटवली आहे.