बोगस बंगाली डॉक्टरचा पर्दाफाश; औषधसाठा जप्त

वैद्यकीय पात्रता नसतानाही रुग्णांवर उपचार; सालिंद्यात प्रशासनाची धडक कारवाई

| पेण | प्रतिनिधी |

वडखळ पोलीस ठाण्याच्या हद्दीतील एल. अँड टी. कॉलनी, सालिंदे येथे वैद्यकीय पात्रता नसतानाही डॉक्टर असल्याचे भासवून रुग्णांवर उपचार करणाऱ्या बोगस डॉक्टरवर प्रशासनाने धडक कारवाई केली. दीपकर सुशांत दास मूळ रा. चक, जितीकापोटा, पश्चिम बंगाल याला ताब्यात घेऊन त्याच्याविरुद्ध गुन्हा दाखल करण्यात आला आहे.

19 ऑगस्ट रोजी सायंकाळी साडेचारच्या सुमारास आरोग्य विभागाकडून तपासणी सुरू असताना सालिंदे येथील एका पडीक पत्र्याच्या शेडमध्ये दीपक दास हा अनधिकृतपणे दवाखाना चालवत असल्याचे आढळून आले. तपासणीदरम्यान त्याच्याकडे मोठ्या प्रमाणात औषधे व इंजेक्शनचा साठा सापडला. अधिकाऱ्यांनी त्याच्याकडे वैद्यकीय पात्रतेबाबत चौकशी केली असता कोणतीही वैद्यकीय शैक्षणिक पात्रता नसल्याचे समोर आले. यापूर्वी कलकत्ता येथे कंपाउंडर म्हणून काम केल्याची माहिती त्याने अधिकाऱ्यांना दिली.

दरम्यान, चौकशी सुरू असताना आरोपीने घटनास्थळावरून पळून जाण्याचा प्रयत्न केला. मात्र, पथकाने त्याला पकडून वडखळ पोलिसांच्या ताब्यात दिले. कारवाईत तब्बल 54 हजार 614 रुपये किमतीचा औषध व इंजेक्शनचा साठा जप्त करण्यात आला. याशिवाय दवाखान्यातील टेबल, खुर्च्या, स्टूल, मांडण्या, बेड आणि कापडी पार्टिशन आदी साहित्यही जप्त करण्यात आले. दरम्यान, या बोगस डॉक्टरला औषधे आणि इंजेक्शनचा पुरवठा करणाऱ्या मेडिकल सप्लायरचीही सखोल चौकशी करून त्याच्यावर कारवाई करावी, अशी मागणी होत आहे. बोगस डॉक्टरपर्यंत औषधांचा साठा पोहोचला कसा, याचा तपास करण्याची गरज निर्माण झाली आहे.

ही कारवाई पेणचे गटविकास अधिकारी गजानन लेंडी, प्राथमिक आरोग्य केंद्र गडबचे वैद्यकीय अधिकारी डॉ. चेतन अविनाश म्हात्रे, आरोग्य सहाय्यक दीपक पुंडलिक म्हात्रे, गणपत जानू वारगुडे, उल्हास हिराजी म्हात्रे, सागर सुनील पाटील आणि पोलीस कॉन्स्टेबल ठाकूर यांच्या पथकाने केली. वैद्यकीय अधिकारी डॉ. चेतन म्हात्रे यांच्या फिर्यादीवरून वडखळ पोलीस ठाण्यात गुन्हा दाखल करण्यात आला आहे. वडखळ पोलीस निरीक्षक संतोष जाधव यांच्या मार्गदर्शनाखाली उपनिरीक्षक श्रीमती सांगळे पुढील तपास करीत आहेत.