पुणे-मुंबई द्रुतगती मार्गावर पाम तेलाचा टँकर उलटून आग

। पाताळगंगा । प्रतिनिधी ।

पुणे-मुंबई द्रुतगती मार्गावर खोपोली पोलीस ठाण्याच्या हद्दीत पाम तेलाने भरलेला टँकर उलटून त्याला आग लागल्याची घटना शनिवारी (दि.29) दुपारी घडली. अपघातानंतर टँकरच्या केबिनमध्ये चालक अडकल्याने काही काळ घटनास्थळी चिंताजनक परिस्थिती निर्माण झाली होती. मात्र, विविध यंत्रणांनी तत्परतेने बचावकार्य राबवत चालकाला सुखरूप बाहेर काढल्याने मोठी जीवितहानी टळली.

टँकरवरील चालक इर्शाद अहमद रहमान (27) रा. बस्ती, उत्तर प्रदेश हे बंगळूर येथून पाम तेल घेऊन तळोजाच्या दिशेने जात होते. दुपारी साडे बारा वाजण्याच्या सुमारास मुंबई लेनवरील चालकाचा वाहनावरील ताबा सुटल्याने टँकर उलटला. त्यानंतर टँकरला आग लागली. दरम्यान, खोपोली नगरपरिषद व ए.एम.एन.एस. कंपनीच्या अग्निशमन पथकांनी प्रयत्नांची शर्थ करून आग नियंत्रणात आणली. पाम तेलामुळे निर्माण होणारा धोका लक्षात घेऊन हेल्प फाउंडेशनचे केमिकल एक्स्पर्ट धनंजय गीध यांनी घटनास्थळी पाहणी करून आवश्यक उपाययोजना केल्या. क्रेनच्या सहाय्याने अपघातग्रस्त टँकर बाजूला करून वाहतूक सुरळीत करण्यात आली. घटनेची माहिती मिळताच खोपोली पोलीस ठाण्याचे पोलीस निरीक्षक सचिन हिरे, महामार्ग वाहतूक पोलीस यंत्रणा तसेच बोरघाटचे सहाय्यक पोलीस निरीक्षक स्वप्नील पाटील यांनी घटनास्थळी धाव घेतली. खोपोली पोलीस, महामार्ग वाहतूक पोलीस, बोरघाट टीएपी, आयआरबी पेट्रोलिंग पथक आणि हेल्प फाउंडेशनच्या जवानांनी संयुक्तपणे बचावकार्य केले. केबिनमध्ये अडकलेल्या चालकाला अखेर सुखरूप बाहेर काढण्यात आले. किरकोळ दुखापत झालेल्या चालकाला पुढील उपचारासाठी एमजीएम रुग्णालयात पाठविण्यात आले.