लिफ्टमध्ये अडकलेल्या चिमुकल्याची सुखरूप सुटका

अग्निशमन जवानांच्या तत्परतेमुळे अनर्थ टळला

। खांदा कॉलनी । प्रतिनिधी |

खारघर-तळोजा जेल रोड परिसरातील सेक्टर 19 मधील खारघर रेजन्सी आयकॉन सोसायटीच्या 20व्या मजल्यावर लिफ्टमध्ये पाच वर्षीय मुलगा अडकल्याची घटना घडली. घटनेची माहिती मिळताच सिडको अग्निशमन दलाच्या खारघर केंद्रातील जवानांनी तातडीने घटनास्थळी धाव घेत चिमुकल्याची सुखरूप सुटका केली.

अग्निशमन दलाला गुरुवारी (दि.18) सायंकाळी 7.20 वाजता लिफ्टमध्ये मुलगा अडकल्याची वर्दी मिळाली. काही वेळातच अग्निशमन दलाचे वाहन घटनास्थळी पोहोचले. पाहणी केली असता 20व्या मजल्यावर लिफ्ट अडकली असून त्यामध्ये पाच वर्षीय मुलगा असल्याचे जवानांच्या निदर्शनास आले. लिफ्टची चावी वापरून दरवाजा उघडण्याचा सुरुवातीला प्रयत्न करण्यात आला. मात्र, दरवाजा उघडण्यात यश आले नाही. त्यामुळे जवानांनी प्रसंगावधान राखत लिफ्टच्या दरवाजाच्या फटीतून मुलाला पाण्याची छोटी बाटली दिली. तसेच त्याला धीर देत घाबरून जाऊ नये, असे सांगितले. यानंतर अग्निशमन जवानांनी हायड्रोलिक स्प्रेडर आणि कटरच्या साहाय्याने लिफ्टचा दरवाजा उघडला. अथक प्रयत्नांनंतर मुलाला सुरक्षितपणे लिफ्टमधून बाहेर काढण्यात आले.

लिफ्टमधून बाहेर येताच चिमुकला कियान राहुल जग्याशी (5) आपल्या वडिलांना बिलगून रडू लागला. मुलगा सुखरूप असल्याचे पाहून त्याच्या आई-वडिलांच्या डोळ्यांत आनंदाश्रू तरळले. या प्रसंगानंतर कुटुंबीयांनी अग्निशमन दलाच्या जवानांचे मनापासून आभार मानले.

या बचावकार्यात अग्निशमन प्रणेता प्रशांत दरेकर, फायरमन पी. आर. पाटील, पी. सी. सोंडे, सी. सी. पवार आणि यंत्रचालक पी. एस. निकाळे यांनी सहभाग घेतला. जवानांच्या तत्परतेमुळे मोठा अनर्थ टळला.