जि.प.च्या नव्या इमारतीची प्रतीक्षा

36 महिन्यांत काम पूर्ण करण्याचे ठेकेदाराला पत्र

| रायगड | जिल्हा प्रतिनिधी |

रायगड जिल्हा परिषदेचे माजी अध्यक्ष स्व. प्रभाकर पाटील यांच्या संकल्पनेतून अलिबागमध्ये 43 वर्षांपूर्वी जिल्हा परिषदेची भव्यदिव्य इमारत बांधण्यात आली होती. जिल्ह्याचा प्रशासकीय गाडा हाकणाऱ्या अलिबाग येथील रायगड जिल्हा परिषदेच्या इमारतीचे स्ट्रक्चरल ऑडीट माणगाव येथील लोणेरे येथील डॉ. बाबासाहेब आंबेडकर तंत्रशास्त्र विद्यापिठातील स्थापत्य अभियंत्यामार्फत करण्यात आले होते. या अहवालात ही इमारत धोकादायक असल्याचे सांगण्यात आले होते. त्यामुळे ही इमारत पाडून त्या जागी नव्याने इमारत बांधण्याची हालचाल सुरु झाली आहे. या नव्या इमारतीचे बांधकाम 36 महिन्यांत पूर्ण करण्याचे आदेश पत्रानुसार देण्यात आले आहेत. त्यामुळे जिल्हा परिषदेच्या नव्या प्रशासकीय इमारतीची आता रायगडकरांना प्रतीक्षा लागून राहिली आहे. दिवाळीनंतर प्रत्यक्ष कामाला सुरुवात होणार असून, याबाबत ठेकेदाराला काम तातडीने सुरु करण्याचे पत्र बांधकाम विभागाकडून देण्यात आले आहे.

रायगड जिल्हा परिषदेचे माजी अध्यक्ष स्व.प्रभाकर पाटील यांच्या काळात 1978 साली अलिबागमध्ये अद्ययावत अशी जिल्हा परिषदेची भव्य इमारत उभारण्यात आली. 1983 साली काम पूर्ण झाल्यावर इमारतीला ‌‘शिवतीर्थ‌’ असे नाव देण्यात आले. या इमारतीत जिल्हा परिषद अध्यक्षांसह उपाध्यक्ष, स्थायी व विषय समितीचे सभापती, मुख्य कार्यकारी अधिकारी, उपमुख्य कार्यकारी अधिकारी, तसेच समाजकल्याण, दिव्यांग विभाग, महिला व बालकल्याण विभाग, अर्थ व बांधकाम विभाग अशा वेगवेगळ्या विभागाची कार्यालये एका छताखाली आणण्याचा प्रयत्न स्व. प्रभाकर पाटील यांनी केला. या इमारतीला 43 वर्षे पुर्ण झाली असून, समुद्रकिनाऱ्यालगत ही इमारत असल्याने तसेच इमारतीमध्ये पावसाच्या पाण्यामुळे होणारी गळती भिंती, छतांची वारंवार दुरुस्ती करावी लागत होती. या इमारतीचे स्ट्रक्चरल ऑडीट चार वर्षांपूर्वी करण्यात आले होते. या अहवालानुसार, इमारतीमध्ये मोठ्या प्रमाणात संरचनात्मक दुरुस्त्या करणे आवश्यक असल्याचे सांगण्यात आले. तसेच, ही इमारत भुकंपीय क्षेत्र चारमध्ये असल्याने एखादा भूकंप झाल्यास मोठा अनर्थ ओढावण्याची भिती निर्माण झाली होती. तसेच, या इमारतीमध्ये प्रशासकीय दृष्ट्या कर्मचारी बसण्यासाठी व कार्यालयीन कामकाजासाठी पुरेशी जागा नव्हती, असे कारण सांगून ही इमारत तोडण्यात आली. सध्या जिल्हा परिषदेचा कारभार कुंटेबाग येथील जागेतून चालत आहे.

नव्याने बांधण्यात येणाऱ्या इमारतीचा अपेक्षित खर्च 125 कोटी रुपयांचा आहे. हे काम पुणे येथील मे टी ॲन्ड टी इन्फ्रा लिमीटेड या कंपनीला देण्यात आले आहे. त्यासाठी वेगवेगळ्या विभागाची परवानगी घेण्यात आली आहे. तसेच, सात मजली नव्याने बांधण्यात येणारी नवी इमारत पाडलेल्या जुन्या इमारतीच्या जागीच उभी करणार आहेत. तर, दुसरी इमारत अलिबाग पंचायत समिती कार्यालयाजवळ बांधण्यात येणार आहे. ती इमारत पाच मजली असणार आहे. त्यासाठी नवीन प्रशासकीय इमारतीच्या बांधकामासाठी हालचाल सुरु झाली आहे. दिवाळीनंतर या इमारतीच्या प्रत्यक्षा कामाला सुरुवात होण्याची शक्यात आहे. या इमारतीच्या बांधकामासाठी राज्य सरकारकडून निधीही प्राप्त झाल्याची माहिती जिल्हा परिषदेकडून उपलब्ध झाली आहे.

अशी असणार इमारत
तळ मजल्यावर पूर्णपणे पार्किंगची व्यवस्था केली जाणार आहे. त्यावर सात मजले असणार आहे. पाणी पुरवठा, आरोग्य, शिक्षण, ग्रामपंचायत, महिला व बालकल्याण, अर्थ व बांधकाम अशी वेगवेगळी कार्यालये एका छताखाली असणार आहेत. साधारपणे 550 कर्मचाऱ्यांच्या कामासाठी प्रशस्त जागा असणार आहे.अभियंत्यांसाठी स्वतंत्र कक्षाचे नियोजन केले आहे. सीसीटीव्ही कॅमेरांसह संरक्षक भिंतदेखील असणार आहे.

ठेकेदाराला काम सुरु करण्याचे पत्र
पुणे येथील प्रो.प्रा. शिवराम थोरवे यांना या इमारतीच्या बांधकामाचा ठेका दिला आहे. त्यांनी भरलेली निविदा सक्षम अधिकाऱ्यांनी मंजूर केली आहे. कामाची सुरुवात त्वरित सुरू करण्यात यावे. काम 36 महिन्यांपर्यंत म्हणजे तीन वर्षात पूर्ण करण्याची मुदत आहे. असे पत्र जिल्हा परिषद बांधकाम विभागाचे कार्यकारी अभियंता यांच्याकडून देण्यात आले आहे.