विविध पोलिस ठाण्यात गंभीर गुन्हे दाखल असलेला चंद्रकांत म्हात्रे एमपीडीएखाली स्थानबद्ध

रायगड पोलिसांनी केली कारवाई
। अलिबाग । विशेष प्रतिनिधी ।
रायगड जिल्ह्यातील पाली, रोहा, नागोठणे, पोयनाड अशा विविध पोलिस ठाण्यात गंभीर गुन्हे दाखल असलेल्या वरवटणे, पो.नागोठणे येथील चंद्रकांत म्हात्रे याला एमपीडीएखाली (महाराष्ट्र प्रोहिबिशन ऑफ डेंजरस अ‍ॅक्टिविटी (एमपीडीएखाली) रायगड पोलिसांच्या प्रस्तावाला मान्यता देत जिल्हा प्रसानाने स्थानबद्ध करण्यास मान्यता दिली आहे. चंद्रकांत दगडु म्हात्रे, वय 36 वर्षे, रा.वरवटणे, पो.नागोठणे, ता.रोहा, जि.रायगड याचे विरूध्द पाली, रोहा, नागोठणे, पोयनाड पोलीस ठाणे अभिलेखावर जबरी चोरी व चोरी या सदराखाली मालमत्तेचे वेगवेगळे गंभीर स्वरूपाचे गुन्हे दाखल आहेत. त्यापैकी पोयनाड पोलीस ठाणेकडे दाखल असलेल्या गुन्हयात संबंधीत न्यायालयाने त्यास शिक्षा ठोठावुनही त्याचे वर्तनात सुधारणा होत नव्हती. उलट तो आणखी गुन्हे करण्यास प्रवृत्त होत होता. त्यामुळे त्यास यापुढे समाजात मोकळे राहु दिल्यास सर्वसामान्य जनतेत घबराटीचे, दहशतीचे व असुरक्षिततेचे वातावरण निर्माण होवुन, त्याचे जनमाणसांच्या जिवनावर प्रतिकुल परिणाम होतील. तसेच त्याच्यापासुन लोकांच्या जिवीतास व मालमत्तेस धोका निर्माण होईल, यास्तव चंद्रकांत दगडु म्हात्रे याच्यावर ” महाराष्ट्र झोपडपट्टी दादा, हातभट्टीवाले, औषधीद्रव्य विषयक गुन्हेगार, धोकादायक व्यक्ती, दृकश्राव्य कलाकृतींचे विनापरवाना प्रदर्षन करणा-या व्यक्ती (व्हिडीओ पायरेट्स), वाळु तस्कर व अत्यावष्यक वस्तुंचा काळाबाजार करणा-या व्यक्ती यांच्या विघातक कृत्यांना आळा घालण्याबाबत अधिनियम 1981 (सुधारणा 1996, 2009 व 2015)“ (एमपीडीए) नुसार कारवाई करणे आवश्यक झाले होते.

चंद्रकांत दगडु म्हात्रे याच्या विरूध्द पाली, नागोठणे, रोहा आणि पोयनाड या विविध पोलिस ठाण्यात तब्बल ११ गंभीर स्वरूपाचे गुन्हे दाखल आहेत. त्याचप्रमाणे पोयनाड पोलिस ठाण्यातील एका गुन्ह्यात न्यायालयाने शिक्षा देखील सुनावली आहे. तरी देखील त्याच्या गुन्हेगारी वर्तनात कोणत्याही प्रकारची सकारात्मक सुधारणा होत नसल्याचे दिसुन येत होते. म्हणुन पोलीस अधीक्षक अशोक दुधे यांच्या मार्गदर्षनाखाली चंद्रकांत दगडु म्हात्रे याच्या विरूध्द एम.पी.डी.ए. नुसार कारवाई व्हावी म्हणुन जिल्हादंडाधिकारी रायगड यांच्याकडे प्रस्ताव सादर करण्यात आला होता. या प्रस्तावाची दखल घेवुन तसेच चंद्रकांत दगडु म्हात्रे याची गुन्हेगारी पार्श्वभूमी पाहुन समाजातील घबराट आणि भिती निर्माण झाल्याचे तपासुन चौकशी अंती जिल्हाधिकारी यांनी चंद्रकांत म्हात्रे याच्यावर एमपीडीए प्रमाणे कारवाईच्या प्रस्तावास मंजुरी दिल्याने त्यास जिल्हा कारागृह, रायगड-अलिबाग येथे स्थानबध्द करण्यात आले आहे.