स्वदेसने ओलांडला दीड लाख लसीकरणाचा टप्पा

व्हॅक्सिनेशन ऑन व्हील उपक्रम
। अलिबाग । भारत रांजणकर ।
स्वदेस फाउंडेशनच्या वतीने रायगड, नाशिक व कोल्हापूर जिल्ह्यामध्ये कोविड लसीकरणाचा व्हॅक्सिनेशन ऑन व्हील हा उपक्रम सुरु आहे. यात आतापर्यंत दीड लाख लसीकरणाचा टप्पा पार केला आहे. रायगड जिल्ह्यात 50 हजार लसीकरणाचे लक्ष्य पूर्ण करण्यात आले आहे.
गेल्या वर्षी मे महिन्यामध्ये रायगड जिल्हा परिषद व स्वदेस फाउंडेशन यांच्यात सामंजस्य करार करण्यात आला व या उपक्रमाची सुरुवात माणगाव तालुक्यातील तासगाव आदिवासीवाडी येथून रायगड जिल्हा पालकमंत्री अदिती तटकरे व जिल्हा परिषद मुख्य कार्यकारी अधिकारी डॉ. किरण पाटील यांच्या हस्ते झाला होता. व्हॅक्सिनेशन ऑन व्हील कार्यक्रमांमध्ये स्वदेस फाउंडेशनच्या वतीने नर्स, डेटा एंट्री ऑपरेटर, ड्रायव्हर, अँब्युलन्स व तिला लागणारा इंधन खर्च करण्यात येत आहे व जिल्हा प्रशासनाच्या वतीने कोविड प्रतिबंधक लस उपलब्ध करून देण्यात येत आहे.
स्वदेस फाउंडेशनच्या वतीने रायगड जिल्हयामध्ये 7 अँब्युलन्सद्वारे पनवेल पेण, कर्जत, महाड-पोलादपूर, म्हसळा, श्रीवर्धन, माणगाव-तळा सुधागड या तालुक्यामध्ये तसेच नाशिक जिल्ह्यामध्ये 12 अँब्युलन्सद्वारे पेठ, सुरगाणा, बागलाण, त्र्यंबकेश्‍वर , इगतपुरी, चांदवड, नांदगाव, येवला, मालेगाव तसेच कोल्हापूर जिल्ह्यामध्ये 3 अँब्युलन्सद्वारे पन्हाळा, शाहुवाडी व चंदगड- आजरा या तालुक्यामध्ये लसीकरण करण्यात आले. व्हॅक्सिनेशन ऑन व्हील या उपक्रमांतर्गत अत्यंत दुर्गम गावामध्ये घरामध्ये असणारे रुग्ण, अपंग यांना लसीकरण करण्यात येत आहे आत्तापर्यंत महाड 9 हजार 737, माणगाव 7 हजार 508, म्हसळा 7 हजार 888, पोलादपुर 4 हजार 64, श्रीवर्धन 3 हजार 533, सुधागड 7 हजार 158, तळा 2 हजार 843, पेण 2 हजार 612, पनवेल 2 हजार 512 कर्जत 3 हजार64 असे एकूण 50 हजार 949 लसीकरण करण्यात आले आहे. स्वदेस फाउंडेशन व जिल्हा परिषद नाशिक यांच्या मध्ये लसीकरण करण्यासाठी सामंजस्य करार करण्यात आला आहे, या सामंजस्य करारानुसार आतापर्यंत नाशिक जिल्ह्यात 1 लाख लसीकरण करण्यात आले आहे त्यामुळे नाशिक जिल्ह्याचा लसीकरणाचा टक्काही वाढला आहे. कोल्हापूर जिल्ह्यामध्ये 3 अँब्युलन्स द्वारे पन्हाळा, शाहूवाडी व चंदगड-आजरा या तालुक्यामध्ये 11 हजार 597 लसीकरण करण्यात आले आहे.
व्हॅक्सीनेशन ऑन व्हील कार्यक्रम यशस्वी करण्यासाठी मुख्य कार्यकारी अधिकारी, जिल्हा आरोग्य अधिकारी, लसीकरण अधिकारी, सर्व तालुक्यांचे तालुका आरोग्य अधिकारी, वैद्यकीय अधिकारी, आशा व स्वदेस फाउंडेशनची सर्व टीम मेहनत करत आहे. उपक्रम यशस्वी करण्यासाठी स्वदेस फाउंडेशन मुंबई चे संस्थापक रॉनी स्क्रूवाला व झरीना स्क्रूवाला, मुख्य कार्यकारी अधिकारी मंगेश बांगे, संचालक राहुल कटारिया, उपसंचालक तुषार इनामदार, महाव्यवस्थापक डॉ. सुरेंद्र यादव, व्यवस्थापक डॉ. सचिन अहिरे, विशाल वरुटे, सुधीर वाणी यांनी विशेष परिश्रम घेतले.