राजिप शाळा हटाळेच्या विद्यार्थ्यांचा रायगडात डंका

तीन विद्यार्थ्यांची ‘इस्रो’ भेटीसाठी निवड जिल्हा परिषद शाळेच्या शिरपेचात मानाचा तुरा

| अलिबाग | प्रतिनिधी |

ग्रामीण भागातील विद्यार्थ्यांच्या कल्पकतेला विज्ञानाची जोड, जिद्दीला आधुनिक तंत्रज्ञानाची साथ आणि स्वप्नांना योग्य मार्गदर्शन मिळाले, तर हे विद्यार्थीही अंतराळाला गवसणी घालू शकतात, याचा प्रत्यय रायगड जिल्ह्यातील हटाळे येथील विद्यार्थ्यांनी घडवून आणला आहे. अलिबाग तालुक्यातील नागाव केंद्रांतर्गत असलेल्या राजिप उच्च प्राथमिक शाळा, हटाळे येथील तीन विद्यार्थ्यांची भारतीय अंतराळ संशोधन संस्था अर्थात ‘इस्रो’च्या श्रीहरिकोटा येथील सतीश धवन अंतराळ केंद्राला भेट देण्यासाठी निवड झाली आहे. या ऐतिहासिक यशामुळे हटाळे शाळेच्या शैक्षणिक वाटचालीत नवा अध्याय जोडला गेला असून, जिल्ह्यातील राजिप शाळांच्या शिरपेचात मानाचा तुरा रोवला गेला आहे.

डॉ. ए.पी.जे. अब्दुल कलाम इंटरनॅशनल फाऊंडेशन, रामेश्वरम यांच्या वतीने पुणे येथे आयोजित ‘कलाम स्टीम 2026’ या उपक्रमात हटाळे शाळेच्या विद्यार्थ्यांनी उत्कृष्ट सहभाग नोंदविला. विज्ञान, तंत्रज्ञान, अभियांत्रिकी, कला आणि गणित यांच्या एकत्रित शिक्षणातून विद्यार्थ्यांमध्ये वैज्ञानिक दृष्टिकोन, संशोधनवृत्ती, कल्पकता आणि नव संशोधनाची आवड निर्माण करणे हा या उपक्रमाचा मुख्य उद्देश आहे. या उपक्रमातील विद्यार्थ्यांच्या उत्कृष्ट सादरीकरणाची दखल घेत शाळेतील तीन गुणवंत विद्यार्थ्यांना इस्रो भेटीची संधी प्राप्त झाली त्यात नवनाथ भगत इयत्ता सहावी, दक्ष नाईक इयत्ता सहावी, विराज दिवटे इयत्ता पाचवी या विद्यार्थ्यांची निवड झाली आहे. या विद्यार्थ्यांच्या यशामुळे हटाळे गावासह खारनागाव, चौल चुने कोळीवाडा, नागाव परिसरात आनंदाचे वातावरण निर्माण झाले आहे. ग्रामीण भागातील विद्यार्थ्यांना जागतिक दर्जाच्या वैज्ञानिक संस्थेची प्रत्यक्ष भेट घेण्याची संधी मिळणे, ही त्यांच्या शैक्षणिक आयुष्यातील अत्यंत प्रेरणादायी घटना ठरणार आहे.

हटाळे शाळेचे हे यश एका दिवसात मिळालेले नाही. विद्यार्थ्यांमध्ये वैज्ञानिक दृष्टिकोन विकसित करण्यासाठी शाळेत सातत्याने राबविण्यात येणाऱ्या नाविन्यपूर्ण उपक्रमांची ही फलश्रुती आहे. शाळेत उभारण्यात आलेले फिरते तारांगण, साडेनऊ फूट उंचीचे रॉकेट प्रतिरूप, विज्ञान व तंत्रज्ञानाधारित प्रयोग, तसेच अंतराळविषयक विविध शैक्षणिक उपक्रम यांमुळे विद्यार्थ्यांच्या मनात विश्वाविषयी कुतूहल निर्माण झाले आहे.

ग्रह, तारे, ग्रहांच्या कक्षा, उपग्रह, ग्रहणे आणि अंतराळ संशोधन यांसारख्या संकल्पना केवळ पाठ्यपुस्तकांपुरत्या मर्यादित न ठेवता प्रत्यक्ष अनुभवातून समजावून देण्याचा प्रयत्न शाळेत केला जातो. अंतराळातील घडामोडी आणि रॉकेट प्रक्षेपण यांविषयी विद्यार्थ्यांना शाळेतच माहिती व दृश्य अनुभव मिळवून देण्याची व्यवस्था करण्यात आली आहे. त्यामुळे ‘एक दिवस आपणही इस्रोला जाऊ, अंतराळ संशोधन जवळून पाहू’ हे विद्यार्थ्यांनी पाहिलेले स्वप्न आता प्रत्यक्षात साकार होण्याच्या दिशेने वाटचाल करीत आहे.

शाळेचे मुख्याध्यापक डॉ. संदीप वारगे यांच्या विज्ञाननिष्ठ, प्रयोगशील आणि विद्यार्थी-केंद्रित दृष्टिकोनामुळे हटाळे शाळेने वेगळी ओळख निर्माण केली आहे. विद्यार्थ्यांना केवळ परीक्षेत यश मिळविण्यासाठी तयार न करता त्यांच्यामध्ये जिज्ञासा, चिकित्सक विचार, वैज्ञानिक दृष्टिकोन आणि संशोधनाची आवड निर्माण व्हावी, यासाठी ते सातत्याने प्रयत्नशील आहेत.

विद्यार्थ्यांचे पालक संतोष नाईक, महेंद्र भगत आणि संजय दिवटे यांच्यासह मार्गदर्शक शिक्षक डॉ. संदीप वारगे, सीमा नागावकर आणि विजया माळी यांच्या योगदानाचेही कौतुक होत आहे. पंचायत समितीचे गटशिक्षण अधिकारी कृष्णा पिंगळा आणि शिक्षकवर्गाने विद्यार्थ्यांना पुढील वाटचालीसाठी शुभेच्छा दिल्या आहेत.

राजिप शाळांच्या गुणवत्तेचा प्रेरणादायी आदर्श
आजच्या स्पर्धात्मक युगात अत्याधुनिक सुविधा केवळ मोठ्या शहरांतील शाळांपुरत्याच मर्यादित राहू नयेत, तर ग्रामीण भागातील प्रत्येक विद्यार्थ्यालाही विज्ञान आणि तंत्रज्ञानाच्या जगाची दारे खुली व्हावीत, या भूमिकेतून हटाळे शाळेची वाटचाल सुरू आहे. मर्यादित साधनसामग्रीतून नावीन्यपूर्ण उपक्रम राबवून विद्यार्थ्यांना मोठ्या व्यासपीठापर्यंत पोहोचविता येते, हे या यशाने सिद्ध केले आहे.

सर्व स्तरांतून अभिनंदन
या यशाबद्दल शाळा व्यवस्थापन समितीच्या अध्यक्षा समृद्धी संतोष नाईक, ग्रुप ग्रामपंचायतीच्या सरपंच हर्षदा मयेकर, ग्रामस्थ, पालक आणि शिक्षणप्रेमींनी विद्यार्थ्यांचे व त्यांना मार्गदर्शन करणाऱ्या शिक्षकांचे अभिनंदन केले आहे.