माथेरानकरांनी अनुभवला अश्‍वशर्यतींचा थरार

मुख्याधिकार्‍यांच्या हस्ते विजेत्यांचा सत्कार
। माथेरान । वार्ताहर ।
माथेरान नगरपालिका आणि माथेरान युथ सोशल क्लब यांच्या संयुक्त विद्यमाने येथील ऑलम्पिया रेसकोर्स येथे दि.28 आणि 29 मे रोजी, म्हणजेच मे महिन्यातील शेवटच्या विकेंडमध्ये आयोजित केलेल्या अश्‍वशर्यतींचा थरार माथेरानकरांनी अनुभवला. या स्पर्धेचा पारितोषिक वितरण सोहळाही उत्साहात संपन्न झाला.

माथेरानमध्ये भरविण्यात आलेल्या अश्‍वशर्यतींच्या स्पर्धेचा पारितोषिक वितरण सोहळा माथेरान नगरीच्या मुख्याधिकारी सुरेखा भणगे, माथेरान युथ सोशल क्लबचे संस्थापक प्रदीप दिवाडकर, हॉटेल उद्योजक आडी बरुचा, फिल्म निर्मात्या नीता निहलानी, शिवसेना संपर्कप्रमुख प्रसाद सावंत यांच्या प्रमुख उपस्थितीत वीर हुतात्मा भाई कोतवाल क्रीडा संकुल (ऑलम्पिया रेसकोर्स) येथे संपन्न झाला.
या स्पर्धेला माथेरानमध्ये दाखल झालेल्या घोडेस्वार व पर्यटकांबरोबर येथील नागरिकांनी तसेच आसपासच्या परिसरातील आदिवासी बांधवांनी मोठ्या संख्येने हजेरी लावली होती. विविध स्पर्धांचे आयोजन येथे यावेळी करण्यात आले होते. ही स्पर्धा अगदी उत्साहात आणि आनंदात पार पडली.

या स्पर्धेच्या पारितोषिक वितरण सोहळ्यावेळी मुख्याधिकारी तथा प्रशासक सुरेखा भणगे यांनी सर्व विजेत्या स्पर्धकांचे अभिनंदन करून ही स्पर्धा यशस्वी करण्यासाठी आभार मानले. तसेच इतक्या सुंदर नियोजनाबद्दल युथ सोशल क्लबचे सगळे मेंबर्स यांचे कौतुकदेखील केले व अशीच स्पर्धा पुढल्यावर्षीसुद्धा आयोजित करूयात, असे सांगितले. माथेरानमध्ये इतके भरपूर प्रमाणात पर्यटक असूनदेखील आपण सर्व स्थानिक अश्‍वपालकांनी वेळात वेळ काढून या स्पर्धेच्या पारितोषिक वितरण सोहळ्यासाठी उपस्थित राहिलात यासाठी सर्व उपस्थित अश्‍वपालकांचे, स्थानिकांचे आभार मानले. या अश्‍वशर्यतींमध्ये स्थानिक चॅम्पियन जॉकी गोविंद झोरे आणि पर्यटकांमधून चॅम्पियन जॉकी मन्नन सोनी यांची निवड करण्यात आली व त्यांना गौरविण्यात आले.