बोर्लीमध्ये भर पावसात प्रवाशांचे हाल

। दिघी । वार्ताहर ।
श्रीवर्धन तालुक्यातील बोर्लीपंचतन शहराला अद्यापही बसस्थानक मिळालं नाही. त्यामुळे येथे येणार्‍या शालेय विद्यार्थी तसेच इतर प्रवाशांनी धो-धो पडणार्‍या पावसात थांबायचे कुठे, असा प्रश्‍न भेडसावत आहे. मात्र, सातत्याने मागणी होत असताना एसटी महामंडळाच्या दुर्लक्षित कारभारामुळे प्रवाशांना प्रचंड त्रास सहन करावा लागत आहे.
बोर्लीपंचतन बसस्थानकाला दिघी विभागातील अनेक गावे तसेच दिवेआगर, हरिहरेश्‍वर, दिघी- जंजिरा अशी पर्यटनस्थळे एसटी वाहतुकीने जोडली गेली आहेत. येथे दिवसातून ये- जा करणार्‍या 64 गाड्यांची नोंद होत असून मुंबई, पुणे शहारांसह गाव खेड्यातील नागरिक प्रवास करत आहेत. मात्र, शहरात असणारे बस स्थानक दहा महिन्यांपूर्वीच अतिक्रमणमध्ये हटवण्यात आलं. परिणामी आता शाळा सुरू झाल्या आणि शेकडो विद्यार्थी व प्रवासी भर पावसात बसची वाट बघत रस्त्यावर ताटकळत उभे राहत असल्याने पालक वर्गातून चिंता होत आहे. मागील कित्येक महिन्यापासून होत असलेली बसस्थानकाची मागणी अजुनपर्यंत पूर्ण झाली नसल्याने येथील नागरिक तथा प्रवाशी संताप व्यक्त करीत आहे.

या ठिकाणी जिल्हा परिषद, महाविद्यालय व इंग्रजी माध्यमाच्या विविध शाळा आहेत. त्यामुळे विद्यार्थ्यांना बोर्लीपंचतनला शिक्षण घेण्याकरिता आल्याशिवाय पर्याय नाही. शहराच्या वाढत्या महत्वानुसार येथे कित्येक वर्षापूर्वीच मोठे बसस्थानक होणे आवश्यक होते. परंतु लोकप्रतिनिधींच्या अनास्थेमुळे ते होऊ शकले नाही. परिसरातील हजारो विद्यार्थी येथे शिक्षण घेतात. ग्राहकांचा, विद्यार्थ्यांचा व प्रवाशांचा संबंध बसस्थानकाशी येतो. मात्र, प्रवाशांना उभे राहण्यासाठी कोणतीच निवारा शेड नाही. सध्या पावसाळी दिवसांमध्ये प्रवासा दरम्यान या सर्वांनी आसरा घ्यायचा कसा, असा प्रश्‍न पडतो. मागील अनेक महिने त्रास सहन करीत बसची वाट बघावी लागते.

अधिकारीसुध्दा नॉट रीचेबल
अधिक माहितीसाठी पेण विभाग तसेच श्रीवर्धन आगारप्रमुख यांच्याकडे संपर्क साधला असता नेहमीप्रमाणे नॉट रीचेबल उत्तर मिळत आहे. त्यामुळे या समस्येकडे महामंडळाच्या जबाबदार अधिकार्‍यांकडून तसेच स्थानिक प्रशासनाकडून देखील दुर्लक्ष केलं जात आहे.

बोर्लीपंचतन एसटी स्थानक हे पर्यटन दृष्ट्या महत्वाचे आहे.  दिवेआगर येथील पर्यटनाला भेट दिली असता बोर्ली येथे बसायला शेड नसल्याने हाल होत आहेत. तसं तात्पुरती शेड बांधली गेल्यास प्रवाशांसाठी सोयीचे ठरेल. एसटी प्रशासनाने याचा विचार करावा.

प्रसाद नकाते, पर्यटक