। नवी मुंबई । वार्ताहर ।
नवी मुंबई शहरासह मोरबे धरण परिसरात जोरदार पाऊस झाला. शहरात सकाळी साडेआठ ते सायंकाळी साडेआठ वाजेपर्यंत 12 तासांत शहरात 124 तर मोरबे पाणलोट क्षेत्रात 102 मिमी पावसाची नोंद झाली आहे. नवी मुंबई शहराला पाणीपुरवठा करणार्या मोरबे धरण परिसरात पावसाचा जून महिना कोरडाच गेला.
त्यामुळे शहराला पाणीपुरवठा करणार्या मोरबे धरणाची पाणीपातळी खाली गेल्याने पाणीकपात प्रस्तावित आहे; परंतु मागील दोन दिवसांत शहरात व मोरबे परिसरात चांगला पाऊस पडत असल्याने पालिका प्रशासनाला थोडासा दिलासा मिळाला आहे. गेल्या वर्षीच्या तुलनेत अद्यापही धरणाची 5 मीटर पाणीपातळी खाली आहे. गेल्या वर्षीच्या तुलनेत मोरबे धरण परिसरातील पावसाचे प्रमाण कमीच आहे.
मोरबे धरणातील पाणीपातळी खाली असून 23 ऑगस्टपर्यंतच पुरेल एवढे धरणात पाणी आहे. तर धरण भरण्यासाठी 4000 मिमी पावसाची आवश्यकता आहे. यंदा धरण परिसरात कमी पाऊस पडत असून कमी पावसामुळे चिंता कायम आहे; परंतु पाणीकपातीबाबत अद्याप पुढील काही दिवस वेट अॅण्ड वॉचची भूमिका असून तात्काळ पाणीकपात करण्यात येणार नाही. पाणीपुरवठयाबाबत योग्य नियोजन करण्यात येत आहे. मोरबे धरण परिसरात आज 12 तासांत 100 मिमी पाऊस पडला आहे. यापुढेही असाच पाऊस पडल्यास दिलासा मिळेल.
धरणसाठयांत वाढ
नवी मुंबईला पाणीपुरवठा करणार्या मोरबे धरण परिसरातही सोमवारी चांगला पाऊस झाला, त्यामुळे खालावलेल्या धरण पातळीत वाढ झाली. आणखी दोन दिवस पाऊस झाल्यास नवी मुंबईत एक तास पाणीकपातीचे केलेले नियोजन करण्याची गरज भासणार नाही.तर उरणचे रानसई धरण्याच्या पाणीसाठयातही लक्षणीय वाढ झाली आहे.
देहरंग धरणसाठयात वाढ
पनवेल शहराला पाणीपुरवठा करणार्या देहरंग धरणात दोन दिवसांतील पावसामुळे पाणीसाठयात लक्षणीय वाढ झाली आहे. त्यामुळे पनवेलकरांवरील पाणी कपात तूर्तास मिटली आहे. देहरंग धरणाची एकूण पाणी साठवण क्षमता 3.57 दशलक्ष घनमीटर आहे.